‘युएईं अरब समुदाययात धोखा बिल’

एजेन्सी – इरानया राष्ट्रपति हसन रुहानीं संयुक्त अरब इमिरेट्सं इजरायललिसे सम्झौता यानाः तःधंगु गल्ती याःगु खँ धयादीगु दु। वय्कलं इजरायललिसे सम्झौता यानाः युएईं इरानयात धोखा बिउगु खँ धयादीगु दु ।

थ्वहे दथुइ इरानया कट्टरवादी अखबार कायहानया मू सम्पादकं युएईं इजरायललिसे सम्झौता यानाः थःत विरोधया निंतिं वैध निशाना दयेकूगु टिप्पणी यानादीगु दु। कायहानया सम्पादकया नियुक्ति इरानया सर्वोच्च धार्मिक नेता अयातोल्लाह खमेनई याइ ।

वंगु बिहिवाः अमेरिकी राष्ट्रपति डोनाल्ड ट्रम्पं इजरायल व युएई दथुइ सम्झौताया घोषणा यानादीगु दु। थ्व सम्झौताया मू कारण क्षेत्रीय शक्तिशाली देय इरानविरुद्ध गठबन्धन बल्लाकेगु निंतिं याःगु अनुमान यानादीगु दु ।

इरानया राष्ट्रपति रुहानीं टेलिभिजन सम्बोधनय् मध्यपूर्वय् इजरायलया पलाः क्वातुकेगु निंतिं ग्वाहालि याःगुया गम्भिर लिच्वः फयेमालीगु ख्याच्वः नं बियादीगु खः । वय्कलं धयादीगु दु, ‘युएई आः सावधान जुयाच्वनेमाः, छाय्किं वं तःधंगु गल्ती याःगु दु। छगू विश्वासघाटया पलाः ल्ह्वंगु दु। जिमित आशा दु कि याकनं हे गल्ती वाःचायेकाः गलत लँपु त्वःती ।’

मेखे कायहान पत्रिकाय् पिहां वःगु टिप्पणीइ धयातःगु दु, ‘संयुक्त अरब इमिरेट्सं प्यालेस्टिनी नागरिकतय्त धोखा बिउगु दु। थ्व धोखा छगू चिकिचाधंगु धनी देय्, गुगु देय् थःगु सुरक्षा मेपिनिपाखे निर्भर जुयाच्वंगु दु, वयात ‘रेजिस्टेंस’या वैध निशाना दयेकाबी ।’

इरानं अमेरिका व इजरायल विरुद्ध हतियार ल्ह्वनीपिं चरमपन्थी संगठनतय्त ‘रेजिस्टेंस फ्रन्ट’ धाइ । रुहानीं थ्व सम्झौता अमेरिकाय् जुइत्यंगु राष्ट्रपति चुनावय् ट्रम्पयात बल्लाकेगु निंतिं जूगु धासें उकिं थुकिया घोषणा नं ट्रम्पं याःगु खँ धयादीगु दु। रुहानीं न्ह्यसः तयादीगु दु, ‘थ्व सम्झौता छाय् जुल । यदि थ्व सम्झौता गलत मखुसा थुकिया घोषणा मेगु देशं छाय् यायेमाल ? व नं अमेरिकाय् ? छाय्किं वाशिंगटनय् च्वनाच्वंगु उम्ह मनुखं भोट मुनेफयेमा धकाः ला ? छिकपिंस. थःगु दे, थः मनू, मुस्मां व अरब दुनियायात धोखा बियागु खः ला ?’

मेखे इरानया शक्तिशाली सैन्य संगठन रिभिल्युसनरी गार्डरं नं छगू वक्तव्य पिकासें युएई व इजरायल दथुया सम्झौता लिपा ‘मस्तय् हत्या याइपिं यहूदी शासनया विनासया प्रक्रिया तेज गतिं जुइ’ धाःगु दु।

युएईं धाःसा छगू वक्तव्य जारी यानाः इजरायललिसेया थःगु सम्झौता इरानयात लिसः बिइत मखु धकाः धाःगु दु। युएईया विदेश मन्त्री अनवर गरगाशं ब्लुमवर्गलिसे खँ ल्हासें धयादीगु दु, ‘थ्व सम्झौता इरानयात कयाः जूगु मखु। थ्व युएई, इजरायल व अमेरिकायात कयाः जूगु खः । थुकिया कारणं छुं नं कथं इरानविरुद्ध छुं पुचः दयेकेगु मखु ।’

थ्व सम्झौतायात कयाः टर्किं नं युएईष आलोचना यायेधुंकूगु दु। टर्किया राष्ट्रपति रेचेप तैड्ढयब अर्दोआनं थ्व सम्झौताया कारणं टर्किं युएईया थः राजदूतयात लित सःतेफु धयादी धुंकूगु दु ।