विश्वकप क्रिकेट मंगलवाःनिसें सेमिफाइनल, रोहितया कीर्तिमान

इंग्ल्यान्डय् जुयाच्वंगु विश्वकप क्रिकेटय् भारतं न्यूजिल्यान्डलिसे व अष्ट्रेलियां इंग्ल्यान्डलिसे सेमिफाइनल कासा म्हितीगु जूगु दु ।
लिग चरणया अन्तिम निगू कासाया लिच्वः वयेवं अंक तालिकय् भारत शीर्ष थासय् लाःगु दुसा थ्वयां लिउ छसिकथं अस्ट्रेलिया, इंग्ल्यान्ड व न्यूजिल्यान्ड लाःगु दु ।

वइगु जुलाइ ९ तारिखय् भारत व न्यूजिल्यान्ड दथुइ न्हापांगु सेमिफाइनल कासा जुइसा जुलाई ११ य् अस्ट्रेलियाया व न्यूजिल्यान्ड दथुइ निगूगु सेमिफाइनल कासा जुइ । सेमिफाइनलया विजयी टिम दथुइ जुलाई १४ य् फाइनल कासा जुइ ।मेखे थुगु विश्वकपय् भारतया प्रारम्भिक ब्याट्सम्यान रोहित शर्मां न्यागू सतक थ्वानाः न्हूगु कीर्तिमान तःगु दु ।

शर्मां दकलय् लिपांगु शतक शनिवाः श्रीलंकाविरुद्धया कासाय् थ्वाःगु खः । थ्व कासाय् शर्मां १०३ रन दयेकूगु खः । क्रिकेट ख्यलय् हिटम्यानया नामं लोकंह्वाःम्ह शर्मा दकलय् न्हापां पाकिस्तान विरुद्ध १४० रन, बंगलादेश विरुद्ध १०४ रन, इंग्ल्यान्ड विरुद्ध १०२ रन व दक्षिण अफ्रिका विरुद्ध १२२ रन थ्वाःगुु खः ।

शर्र्मां थुगुसी न्यागू सतक थ्वायेगु लिसें विश्वकपय् दकलय् अप्वः खुगू शतक थ्वानातःम्ह महान ब्याट्सम्यान सचिन तेन्दुल्कर लिसे नं बराबरी याःगु दु । तेन्दुल्करं खुगू शतक थ्वायेगु निंतिं विश्वकपय् ४४ गू कासा म्हितूगु खःसा शर्मां धाःसा मुक्कं १६ गू विश्वकप कासाय् हे खुगू शतक थ्यंकूगु खः ।आः जुयाच्वंगु विश्वकपय् जक रोहितं गुंगू कासा म्हितः ६४७ रन दयेकेधुंकूगु दु ।