विश्व नं. १ टिम बेल्जियम युरो कपया निगूगु चरणय्

येँ – युरो कपया समूह बी पाखें बेल्जियम निगूगु चरणय् दुहां वनेत ताःलाःगु दु । बिहिवाः बहनी लिबाक्क जूगु कासाय् डेनमार्कयात २–१ गोलं बुकुसें विश्व नं. १ टिम बेल्जियमं नकआउट चरणय् थाय् दयेकूगु खः ।

कासाया झ्वलय् बेहोस जूम्ह डेनमार्कया कासामि क्रिस्टिन इरिक्सनयात भिं उसाँय्या कामना याःगु कासाया निगूगु मिनेटय् हे युसुफ पोउलिसनं गोल यासें डेनमार्कयात अग्रता बिउगु खः ।

कासाया झिगूगु मिनेटय् १ मिनेटया निंतिं कासा दिकाः इरिक्सनयात भिं उसाँय्या कामना याःगु खः । फिनल्यान्ड लिसे जूगु कासाया इरिक्सन मैदानय् हे बेहास जूगु खः । इरिक्सन १० नं. या जर्सी फिनाः म्हितीम्ह जूगुलिं १० औं मिनेटय् कासा दिकाः सकसिनं लापा थानाः वयागु भिंउसाँय्या कामना याःगु खः ।

कासाया ९९ सेकेन्डय् पोउलिसनं याःगु गोल युरो कप धेंधेंबल्लाखय् हे आःतक दकलय् याकनं जूगु गोलया धलखय् निगूगु थासय् लाःगु दु । कासा सुरु जुइवं गोल याःसां डेनमार्कं थःगु अग्रता कायम याना तयेमफुगुलिं वयात आः निगूगु चरणय् वनेत कठीन जुइगु जूगु दु । इरिक्सन बेहोस जूगु कासाय् नं डेनमार्क फिनल्यान्ड पाखें ०–१ गोलं बूगु खः ।

बेल्जियमया विजयया निंतिं टि हजार्डं छगू व केभिड डि ब्रुनीं छगू छगू गोल याःगु खः । तर ब्रुनीं गोल याःसां गोल सेलिब्रेट धाःसा मयात । अस्पतालय् उपचाररत इरिक्सनया कारणं डेनमार्क भावनात्मक रुपं दबाबय् म्हिताच्वंगुलिं ब्रुनीं खेल भावना न्ह्यब्वसें गोल सेलिब्रेट मयाःगु खः ।
थुगुसीया युरो कपय् छगू गोलं लिउने लानाः नं कासा त्याकूगु टिम बेल्जियम हे न्हापांगु नं जूगु दु । थ्वयां न्ह्यः जूगु बराबरी जूगु बाहेक मेगु फुक्कं कासाय् सुनां न्हापां गोल याःगु खः व हे टिम त्याना वयाच्वंगु खः ।

समूह बीइ आः बेल्जियमया ६, फिनल्यान्ड व रुसया ३–३ अंक जूगु दुसा डेनमार्क धाःसा शून्यय् दु ।