ला लिगा फेसबुकं क्यनीगु

येँ – नेपालय् च्वपिं फुटबल फ्यानतय्सं टेलिभिजन च्यानलय् स्पेनिस ला लिगा स्वये मखनीगु जूगु दु । फेसबुकं भारतीय उपमहादीपय् ‘ला लिगा’ प्रत्यक्ष प्रशारण यायेगु सम्झौता यायेवं टेलिभिजन च्यानल पाखें प्रशारणं मजुइत्यंगु खः। नेपाः लिसें भारत, पाकिस्तान, अफगानिस्तान, बंगलादेश, भुटान, माल्दिभ्स व श्रीलंकाय् ला लिगा प्रशारण फेसबुकं यायेत्यगुं खः ।

सन् २०१४ निसें भारतया सोनी पिक्र्चस नेटवर्क पाखें ला लिगा प्रत्यक्ष प्रशारण याना वयाच्वंगु खःसा थ्व सिजन निसें प्रत्यक्ष प्रशारण अधिकार फेसबुकं काःगु दु । सोनी पिक्र्चसं ३२ मिलियन डलरं सम्झौता यानाः क्यना वयाच्वगुं ला लिगा क्यनेत फेसबुकं गुलि ध्यबा पुल धयागु सीमदुनि ।

फेसबुकं ला लिगा स्वंगू सिजन तक प्रशारण याइगु जूगु दु । छगू सिजनय् ३४० गू कासा जुइ । ला लिगाया डिजिटल रणनीति प्रमुख अल्फ्रेडो बेरजेमां फेसबुकपाखें यक्वसिनं ला लिगा स्वये खनीगु जूगुलिं लय्तायागु खँ धयादीगु दु ।

फेसबुकं सन् २०१७य् मेजर लिग बेसबलया प्रत्यक्ष प्रशारण यायेधुंकूगु दु ।भारतीय उपमहाद्वीपय् ३ सय ४८ मिलियन फेसबुक प्रयोगकर्ता दु । भारतय् जक २ सय ७० मिलियन मनूतय्सं फेसबुक चले याइ ।