मेक्सिकोय् अमेरिका वनेत्यंपिं सछिम्हं मल्याक अवैध आप्रवासी ज्वन

मेक्सिकोया प्रहरीं अवैध रुपं अमेरिका दुहां वनेत्यंपिं १०१ म्हेसित ज्वंगु दु । पूर्व मेक्सिकोया भेराक्रुज राज्यय् ट्याक्टरय् च्वनाः वनाच्वंगु इलय् उमित ज्वंगु खः । ज्वंपिं मध्ये ८६ म्ह वयस्क व मेपिं मस्त जूगु खँ धाःगु दु । थुपिं आप्रवासीत मध्ये अमेरिकी देय् होन्डुरस, एल साल्भाडोर, ग्वाटेमाला व निकारागुवायाया नागरिकत जूगु खँ धाःगु दु ।

अथेहे टान्तोयुका नगरय् नं अमेरिका दुहां वनेत बसय् च्वनावःपिं झिंन्याम्हेसित मेक्सिकोया प्रहरीं ज्वंगु दु । मेक्सिकों वंगु निवाः दुने अमेरिका दुहां वनेत स्वइपिं अवैध आप्रवासीतय् विरुद्ध कारवाही तच्वयेकाहःगु दु । मेक्सिको व अमेरिका दथुइ वंगु जून ७ य् आप्रवासी पनेगु सम्बन्धी सम्झौता जुइधुंकाः मेक्सिकों अमेरिकी सीमापाखे हजारौं सुरक्षाकर्मी परिचालन यानाच्वंगु दु ।

मेक्सिकोय् सुरक्षा कडा यायेवं अमेरिका दुहां वनीपिं आप्रवासीतय्सं धाःसा थाकुगु लँपु ज्वनेगु यानाहःगु दु । थथे हे थाकुगु लँपु पाखें अमेरिका दुहां वनेत स्वःम्ह एल साल्भाडोरया अबु व म्ह्याय्या सीम्ह म्हीगः रिया ग्रान्डे खुसिइ लुइकूगु खः ।

संयुक्त राष्ट्र संघं शरणार्थी सम्बन्धी उच्च आयोगं अबु व म्ह्याय्या थ्व मृत्यु तसकं दुःखद् जूगु व थुकियात स्वीकार यायेमफइगु खँ धाःगु दु । आप्रवासी सम्बन्धी ज्या याना वयाच्वंपिंसं मेक्सिको व अमेरिका दथुइ आप्रवासी पनेगु निंतिं जूगु सम्झौताया हे कारणं आप्रवासीतय्सं थज्याःगु हृदयविदारक मृत्यु फयेमाःगु खँ धाःगु दु ।

सम्बन्धित बुखँ

LEAVE YOUR COMMENTS