अमेरिका–चीन न्हूगु कर ९० न्हु स्थगत यायेत सहमत

अमेरिका व चीन दथुइ व्यापार युद्धया मू हतियार जुयाच्वंगु न्हूगु कर नीतियात छुं ईया निंतिं स्थगित याइगु जूगु दु । अमेरिकी राष्ट्रपति डोनाल्ड ट्रम्प व चिनिया राष्ट्रपति सी जिनपिङ दथुइ जूगु वार्ताय् ९० न्हुया निंतिं स्थगन यायेगु सहमति जूगु खः । व्यापार सम्बन्धी थप वार्ता आवश्यक धासें निम्हं राष्ट्रपति न्हूगु कर दर स्थगन यायेत सहमत जूगु खः ।

अर्जेन्टिनाया ब्युनर्स आयर्सय् जूगु विश्वया नीगू प्रमुख अर्थतन्त्र दुगु देय्तय् दथुया जी२० सम्मेलन क्वचायेवं जूगु बैठकय् ट्रम्प २ सय अर्ब डलरया चिनियाँ सामानय् कर अमप्वयेकेत सहमत जूगु खः । थ्व दथुइ चीनं कृषि, उद्योग व ऊर्जा सम्बन्धी सामान यक्व मात्राय् न्यायेत चाहे जूगु खँ नं अमेरिकां धाःगु दु । चीनं धाःसा निगुलिं पक्ष थःपिनि बजाः चायेकेत सहमत जूगु खँ धाःगु दु ।

थ्व दँया सुरुं निसें खनेदुगु निगू देय् दथुया व्यापार युद्ध लिपा न्हापाखुसी निम्ह नेतातय दथुइ थ्व वार्ता जूगु खः ।ह्वाइट हाउसं छगू वक्तव्य पितबिसें ट्रम्प व सी दथुइ तसकं सफल वार्ता जूगु खँ धाःगु दु । विज्ञप्तिइ चिनियाँ सामानय् अमेरिकाय् तःगु अप्वयेकूगु कर ९० न्हु तक लागु मयायेगु धाःगु दु, लिसें थ्व ई दुने नं निगुलिं पक्ष सहमतिइ मवन धाःसा हाकनं २५ प्रतिशत हे कर थ्यनीगु चेतावनी नं बियातःगु दु ।

चीनया विदेशमन्त्री वाङ यीं निम्ह नेतातय् वार्ता लिपा पत्रकारत लिसे खँ ल्हासें आःया सैद्धान्तिक सहमतिं निगू देय् दथुइ आर्थिक तनाव न्यंके मबिइत प्रभावकारी रुपं ज्या याइगु खँ धयादीगु दु । अमेरिकी राष्ट्रपतिं चिनिया सामानय् कर अप्वयेकेवं निगू देय् दथुइ ताःई न्ह्यवनिसें तनाव ब्वलनाच्वंगु खः ।