ने. सं. ११४३ तछलाथ्व दशमी -

पोर्चुगलय् स्वांयाःपुन्हि

येँ – युरोपेली राष्ट्र पोर्चुगलय् नं तःजिक २५६३ क्वःगु स्वांयाःपुन्हि हंगु दु । वंगु शनिवाः कुन्हु पोर्चुगलय् विश्व शान्तिया अग्रदूत भगवान बुद्धया त्रिसंयोग चूलाःगु २५६३ क्वःगु स्वांयाःपुन्हिया लसताय् नेपाःया अवैतनिक वाणिज्य दूतया ज्याकू व नेपाली संघसंस्थां ग्वसाः ग्वःगु ज्याझ्वलं पोर्चुगलया राजधानी लिस्बन छगुलिं बुद्धमय जूगु खः ।

बुद्ध मूर्तिलिसें बुद्धया किपा, बुद्धवाणी व बुद्धया दिव्योपदेश च्वयातःगु ब्यानर, प्लेकार्डलिसें नेपाःया राष्ट्रिय ध्वाँय् नापं ज्वनाः अन च्वनाच्वंपिं नेपाःमितय्सं राजधानीया मुख्य पर्यटकीय सहर चाःहिलाः बुद्धमय याना बिउगु खः । लिस्बनया रोसियोस्थित समुद्री लागां शुरु जूगु शोभात्रा राजधानीया मुख्य पर्यटकीय लागा चाःहिलाः मोर्तिम मोनिज पार्कय् वयाः क्वचायेकूगु खः ।

पार्कय् जूगु ज्याझ्वलय् नवासें बुद्धजयन्ती मूल समारोह समितिया संयोजकलिसें पोर्चुगलया निंतिं अवैतनिक नेपाली राजदूत मकरबहादुर हमालं भगवान बुद्धया ज्ञान, उपदेश व दर्शनयात विश्वया न्ह्यःने यंकेगु सकलें नेपाःमिया दायित्व जूगु धयादिल । पोर्चुगलया निंतिं नेपाःया पर्यटन दूत रमेशकुमार गुरुङं बुद्धभूमि नेपालय् पर्यटन प्रवद्र्धन यायेमाःगु खँय् बः बियादिल ।

पार्कय् जूगु ज्याझ्वलय् बुद्ध वचनलिसें बुद्धम् शरणम् गच्छामि, धम्मम शरणम् गच्छामि, संघम् शरणम् गच्छामि लगायतया शान्ति सन्देश प्रवाह याःगु खः । उगु इलय् शोभायात्राय् सहभागि जूपिंसं बुद्ध नेपालय् बूगु, बुद्ध शान्तिया प्रतीक जूगु व नेपाल चाःहिले नु धइगु थेंज्याःगु सन्देश नं प्रवाह याःगु खः । ज्याझ्वलय् पोर्चुगलय् च्वंगु थीथी नेपाली संघसंस्थाया प्रतिनिधितय्सं नं संबोधन याःगु ज्याझ्वः स्वयां न्ह्यः धर्मगुरुपाखें बुद्ध पुजा नं याःगु खः ।