ख्वपया हनुमन्ते करिडोरया ज्या बन्द

ख्वप – विकासया निंतिं ख्वप जिल्लाया भाग्य कथं कयातःगु महत्वाकांक्षी योजना ‘हनुमन्ते करिडोर’ दयेकेगु ज्या दथुइ हे दिउगु दु ।
मध्यपुथि थिमि नपा ३ व सूर्यविनायक नपा ३य् लाःगु प्यदुवाःतय् थ्यंगु ज्यायात प्रदेश नं. ३ या सांसदपिं डा. राजेन्द्रमान श्रेष्ठ व प्रतिमा श्रेष्ठं हनुमन्ते करिडोरया ज्या तत्काल दिकेत व छुं नं ज्या मन्ह्याकेत निर्देशन बिइवं ज्या दिउगु खः ।

थुकिया बारे न्यनेकने यानाबलय् डा. श्रेष्ठं धयादीगु दु, ‘सिमांकन समस्या दुगु जनतापाखें गुनासो वःगुलिं जिमिसं हनुमन्ते करिडोर निर्माण दिकागु खः । जितः गोली कयेके धकाः धम्के याःगु दु हँ, जिं छुं न्हि लिपा पत्रकार सम्मेलन यानाः फुक्कं खँ सार्वजनिक याये ।’

अधिकारसम्पन्न बागमति सभ्यता एकीकृत विकास समितिं न्हापांगु चरणया ४ किलोमिटर करिडोर दयेकेगु निंतिं ८१ करोड तकाया ठेक्का आह्वान याःगु खः । बोलपत्र आह्वानकथं पिएस गोल्डेनगुड समानान्तर जेभीं ठेक्का सम्झौता यानाः वि.सं. २०७५ मंसिर निसें हनुमन्ते करिडोर दयेकेगु सुरु याःगु खः ।

न्हापांगु चरणया दयेकेज्या ५५ प्रतिशत क्वचायेधुंकाः आकाझाकां ज्या दथुइ हे दिउगु खँ पिएस गोल्डेनगुडया प्रबन्धक संचालक नीरज थपलियां धयादीगु दु । ख्वप, सूर्य विनायक, चाँगुनारायण व मध्यपुर थिमि यानाः जिल्लाया प्यंगुलिं नगरपालिका जुयाः न्ह्याः वनाच्वंगु बागमति खुसिया सहायक खुसि जुयाच्वंगु हनुमन्ते खुसि ९ किलोमिटर ताःहाकः ।

निदँ दुने स्वंगू चरणय् यानाः दयेके क्वचायेकेगु लक्ष्य तयातःगु हनुमन्ते करिडोरया ज्या न्हापांगु चरणय् हे दिउवंगु खः ।खुसि बाः वनीगु क्षेत्र २० मिटर, जवंखवं २०–२० मिटरया फुटपाथसहित सतक व खुसिया निखेरं तजाःगु पःखाः ग्वयाः खुसिया लः बस्तीइ दुहां वये मफयेक हनुमन्ते करिडोर दयेकेगु ज्या न्ह्याःगु खः ।

मेखे स्थानीयवासीतय्सं धाःसा मध्यपुर थिमि नगरपालिका क्षेत्रय् ब्लक कारखानां तःदँ न्ह्यवनिसें कब्जा कयातःगु करोडौं तूगु न्हय्गू रोपनी सार्वजनिक जग्गा लिफ्याना कायेत पःखाः थुनीगु जुइवं भूमाफियातय् चलखेल यानाः हनुमन्ते करिडोरया ज्या हे दिकाबिउगु द्वपं बिउगु दु ।

राधेराधे निसें छुं हे पंगः मवयेक दयेकायंकूगु करिडोर ब्लक कारखाना न्ह्यःने थ्यनेवं दिउगु व नगरपालिकां तयार याःगु नक्सा कथं ब्लक कारखानां हड्पे यानातःगु न्हय्गू रोपनी जग्गा त्वःते मालीगु जुइवं ज्या हे दिकाबिउगु खँ आयोजनां धाःगु दु ।

सिमांकन विवादयात सम्बन्धित जग्गाधनी, राजनीतिक दलया नेता, सूर्यविनायक नगरपालिका व मध्यपुर थिमि नगरपालिकाया प्रमुख, बालकोटया वडाअध्यक्षसहित च्वनाः तःक्वः हे सहलह यायेधुंकाः ल्यान्डपुलिङ्ग माध्यमं समस्या समाधान यायेगु सहमति कथं थ्व करिडोर दयेकेगु ज्या न्ह्याःगु खः ।

सांसद महेश बस्नेतं थ्व करिडोरया ज्या मजुल धाःसा ख्वपया विकास हे दिइगु खँ धयादीगु दु । तःधंगु कुतः व यक्व दुःख यानाः हयागु थ्व आयोजना दिके मजिउ धासें वय्कलं समस्या दुसा सहलह यानाः न्ह्याः वनेमाःगु खँ धयादीगु दु । सूर्यविनायक नगरपालिकाया प्रमुख वासुदेव थापां नं हनुमन्त खुसिया धाः हिलेगु व सीमा विवाद बारे जग्गाधनीया प्रतिनिधि, राजनीतिक व्यक्तित्व व निगुलिं नगरपालिकाया प्रमुख च्वनाः समस्या समाधान यायेधुनागु खँ धयादीगु दु ।

मध्यपुर थिमि नगरपालिकाया प्रमुख मदन सुन्दर श्रेष्ठं थ्व करिडोर दयेके सिधयेवं न्हापा थें डुबान जुइगु समस्या मदइगु खँ धयादिसें करिडोरया ज्या दिकाः विकासया ज्याय् पंगः थनेगुया छुं औचित्य मदु धयादीगु दु । सूर्यविनायक नगरपालिका वडा नं. ३ या वडाअध्यक्ष शिवशरण खत्रीं बालकोटया पीडित जग्गाधनीया समस्या सम्बोधन जुइधुंकूगु धासें ज्या दिकूगु कारणं खुसिबाः वयाः जनतां विपत्ती फयेमाल धाःसा उकिया जिम्मेवारी ज्या दिकूपिंसं हे कायेमाःगु खँ धयादीगु दु ।

 

सम्बन्धित बुखँ

LEAVE YOUR COMMENTS