प्रधानमन्त्री जुइत देउवा अनिच्छुक

येँ – माओवादी केन्द्रं प्रधानमन्त्री केपी शर्मा ओलीयात बियातःगु समर्थन लितमकाःतले कांग्रेसं सरकार गठन यायेगु निंतिं पहल मयायेगु खँ
नेपाली कांग्रेसया सभापति शेरबहादुर देउवां धयादीगु दु । वय्कलं म्हिगः धरानय् कार्यकर्तापिंत सम्बोधन यायेगु झ्वलय् उगु खँ धयादीगु खः ।

वय्कलं कार्यकर्तायात सम्बोधन यायेगु झ्वलय् माओवादी केन्द्रया समर्थन वर्तमान प्रधानमन्त्री ओलीयात दुगुलिं तत्काल सरकार क्वःथले मफइगु खँ धासें धयादिल, ‘सर्वोच्च अदालतया फैसलां नेकपायात एमाले व माओवादी केन्द्र दयेका बिल । निगुलिं पार्टी सरकारय् दु, अथे जुयाः थ्व मंकाः सरकार खः; प्रचण्डं थःगु पार्टीया मन्त्रीपिंत लित सःतूगु मदुनि, प्रम ओली माओवादी केन्द्रया मन्त्री चीकूगु मदुनि ।’

वय्कलं थीथी सञ्चार माध्यमय् शेरबहादुर देउवां प्रधानमन्त्री दतं नं पद मकासे च्वनाच्वन धइगु खँ वयाच्वंगु दु धासें धयादिल, ‘गबलय् तक माओवादी केन्द्रं थःगु समर्थन लित काइमखु उगु इलय् तक जिं थम्हं यःसां नं प्रधानमन्त्री जुइगु सम्भावना मदु ।’

सभापति देउवां थज्याःगु अवस्थाय् थः फँसे जुइ फइगु सम्भावना दु धासें उकथं थः फँसे जुइगु ज्या थःगुपाखें मजुइगु खँ नं धयादीगु दु । वय्कलं धयादिल, ‘आःया इलय् प्रधानमन्त्री ओलीयाके बहुमत दु, वय्कःयाके बहुमत दुगु इलय् निहुँ मालेगु ज्या यायेमजिउ; गबलय् तक बहुमतया सरकार दइ, उगु इलय् तक निहुँ मालेगु ज्या याये मजिउ, झीपिं विपक्षी खः, थ्व इलय् संगठन दयेकेगु खः, ल्वायेगु ई मखु ।’
सभापति देउवां प्रधानमन्त्रीया निंतिं थः सिना मजुयागु खँ धयादिसें यदि प्रधानमन्त्री जुइमाःगु अवस्था वल धाःसा थः बिसिउँ वनेमखु नं धयादीगु दु ।

सभापति देउवा प्रधानमन्त्री जुइगु स्वयां नं आः वइगु भदौ महिनाय् जुइगु धयातःगु पार्टीया महाधिवेशनय् पार्टी हे कब्जा यायेगु कथं थःत न्ह्यःने वनाच्वंगुलिं यानाः नं वय्कः आः थथें प्रधानमन्त्री जुइत अनिच्छुक जुयाच्वंगु खँ नं सूत्रं धाःगु दु ।

सम्बन्धित बुखँ

LEAVE YOUR COMMENTS