थलि–सक्व लँ मदयेकूगुलिं हानं हडताल

येँ – थलि–सक्व सतकखण्ड पीच मयाःगु विरोधय् स्थानीय वासिन्दां अन लँ पनाः प्रदर्शन याःगु दु । थुकिया लागिं दयेका तःगु संघर्ष समितिं कागेश्वरी मनोहरा नगरपालिकां सतक स्तरोन्नती यायेगु सहमति याःसां नं कार्यान्वयन मयाःगु धासें म्हिगः लँ पना बिउगु खः ।

थ्व स्वयां न्ह्यः वंगु जेठ २८ गते स्थानीय संघर्ष समिति व नगरपालिका दथुइ तत्काल लँय् च्वंगु ध्याचः मुनेगु, छवाःया दुने लँ ग्रेडिङ यानाः वये–वनेत अःपुकेगु व फयांफछि याकनं सतक पीच यायेगु निंतिं बोर्डय् पहल यायेगु सहमति जूगु खः । स्वंगू बुँदे सहमति लिपा स्थानीय जनतां आन्दोलन लित काःगु खः ।

तर, आः तक नं सतकया स्थिति सुधार मजू धासें स्थानीय वासिन्दा म्हिगः आन्दोलनय् कुहां वःगु खः ।स्थानीय वासिन्दाया कथं सलम्बुटार, इन्द्रायणी, नयाँपाटी, डाँछी थलि लगातयया सतकय् ततःगाःगु गाः वनाच्वंगु दु । गुकिं यानाः वा वइबलय् सतक न्यासि वनेत तकं समस्या जुयाच्वंगु दु ।

सतक स्यनाः न्हिथं वये–वने याइगु सवारी साधनया लिसें सर्वसाधारण जनतां सास्ति फये मालाच्वंगु दु । सतक दयेकेगु ज्या न्ह्याःगु प्यदँ दयेधुंकलं नं ज्या बांलाक मन्ह्याःगुलिं स्थानीय वासिन्दा आक्रोशित जुयाच्वंगु दु । ११ किलोमिटर ताःहाकःगु थ्व सतक दयेकेगु निंतिं न्यागू निर्माण कम्पनीं जिम्मा कयातःगु दु । तर ज्याय् प्रगति मजूगु स्थानीय वासिन्दाया धापू दु ।