जिनपिङ्ग उत्तर कोरियाया भ्रमणय्

चिनिया राष्ट्रपति सी जिनपिङ्गं बिहिवाःनिसें उत्तर कोरिया भ्रमण सुरु यानादीगु दु । जिनपिङ्ग निन्हुयंकंया भ्रमणया निंतिं उत्तर कोरिया झायादीगु खः । थ्व भ्रमणया झ्वलय् जिनपिङ्गं उत्तर कोरियाली नेता किम जोंग उन लिसे परमाणु निशस्त्रीकरण व आर्थिक मुद्दाय् खँल्हाबल्हा याइगु खँ धाःगु दु ।

जापानय् जुइत्यंगु जी २० या सम्मेलन न्ह्यव निम्ह नेतातय् दथुइ जूगु खँल्हाबल्हायात नं अर्थपूर्ण रुपं वयाच्वंगु दु । जापानय् जिनपिङ्गं अमेरिकी राष्ट्रपति डोनाल्ड ट्रम्पलिसे नं खँल्हाबल्हा यायेत्यंगु दु । वंगु दछि न्ह्यवनिसें शी जिनपिङ्ग व किम जोंग उन दथुइ नापलायेगु ज्या तच्वयावःगु दु ।

थ्व दछिया दुने जक निम्ह नेतातय् दथुइ प्यक्वः खँल्हाबल्हा जुइधुंकूगु दु । तर चिनिया राष्ट्रपति उत्तर कोरिया वंगु धाःसा न्यादँ लिपा न्हापांखुसी खः ।

जिनपिङ्ग उत्तर कोरियाली नेता लिसे परमाणु निशस्त्रीकरण बारे खँल्हाबल्हा यानाः जापानय् ट्रम्प लिसे नं थ्व बारे खँल्हाबल्हा यायेफुगु खँ धाःगु दु । उत्तर कोरियाया परमाणु निःशस्त्रीकरण सम्बन्धी छुं ई न्ह्यव जक उत्तर कोरियाली नेता व अमेरिकी राष्ट्रपति दथुइ निक्वः वार्ता जुइधुंकूगु दु ।