ने. सं. ११४३ चौलाथ्व तृतीया -

कुमारीत्व परीक्षण गैरकानुनी ठहर

एजेन्सी – पाकिस्तानया छगू अदालतं बलात्कारया घटनाया अनुसन्धान यायेगु झ्वलय् जुइगु ‘कुमारीत्व परीक्षण’ यात गैरकानुनी ठहर यासें फैसला न्यंकूगु दु। पाकिस्तानया पञ्जाब प्रान्तं याःगु थ्व फैसलायात मानव अधिकारकर्मीतय्सं लसकुस याःगु दु। अदालतया थ्व फैसला लिपा आः मिस्तय् योनिइ पतिं दुछ्वयाः याइगु कुमारीत्व परीक्षणया चलनया अन्त्य जुइगु विश्वास याःगु दु ।

लाहोर उच्च अदालतया न्यायाधीश आयिसा मलिकं थज्याःगु कथं याइगु जाँच तसकं अपमानजनक जूगु व थुकिया विधिविज्ञानलिसे छुं महत्व मदुगु धासें कुमारीत्व परीक्षण गैरकानुनी जूगु फैसला न्यंकूगु खः । बलात्कारया घटनाया अनुसन्धानय् चिकित्सकीय मूल्याकन कथं याइगु थज्याःगु जाँचय् वैज्ञानिक आधार मदुगु दावी अभियानकर्मीतय्सं याना वयाच्वंगु दु। आः वःगु अदालतया फैसला मेमेगु प्रान्तय् नं नजि जुइगु खँ धाःगु दु। सिन्ध प्रान्तया उच्च अदालतय् छगू थज्याःगु हे मुद्दा विचाराधीन अवस्थाय् दु ।

पाकिस्तानय् मिस्तय् योनिइ छपु व निपु पतिं दुछ्वयाः योनिया झिल्लीया अवस्था जाँच यानाः सैद्धान्तिक रुपं मिस्त यौनिक गतिविधिइ क्रियाशील दु वा मदु व गुलि मात्राय् क्रियाशिल दु धयागु स्वयेगु चलन दयाच्वंगु खः । छुं छुं चिकित्सकतय्सं थज्याःगु जाँचं सुं मिसालिसे न्हापांखुसी यौनक्रिया जूगु खः कि मखु धयागु सीकेफइ धयागु दाबी यानाच्वंगु दु। अथे थज्याःगु जाँच यानाः बलात्कारपाखें पीडित मिसायात न्हापांनिसें यौन गतिविधि संलग्न जुयाच्वंम्ह धकाः अःखःबतं वयात हे दोषी ठहर यायेगु याइ ।

विश्वस्वास्थ्य संगठनं थज्याःगु जाँच औचित्यहिन जूगु व थुकी छुं वैज्ञानिक आधार मदुगु स्पष्ट रुपं धयातःगु दु । थज्याःगु परीक्षणयात मानव अधिकार हनन कथं कायेगु याना वयाच्वंगु दु ।