अस्ट्रियाय् मेपिनिगु ग्वाहालि कयाः आत्महत्या याये दइगु कानुन पारित

एजेन्सी- मध्य युरोपेली देय् अस्ट्रियाय् मेपिनिगु ग्वाहालि कयाः आत्महत्या यायेदइगु कानुन कार्यान्वयनय् वःगु दु । तसकं रोगी व कमजोर शारीरिक अवस्थायापिं वयस्कतय्सं थ्व हे वाःनिसें मेपिनिगु ग्वाहालिं आत्महत्या यायेदइगु प्रावधान हःगु खः । संवैधानिक अदालतया निर्देशनय् वंगु महिनाय् अस्ट्रियाया संसदं थ्व कानुन दयेकूगु खः ।

थःगु इच्छा, मेपिनिगु ग्वाहालिं आत्महत्या याये दुसां थुकिया निंतिं कडा नियम दयेकूगु दु । नियमकथं आत्महत्या याये चाहे जूपिंत निम्ह चिकित्सकतय्सं मूल्याङ्कन यानाः स्वीकृृति बिइमाःसा निम्ह मध्ये छम्ह चिकित्सकं प्यालप्लीअटिभ केयर (गम्भीर ल्वय् जुइबलय् विशेष हेरचाह याइम्ह विशेषज्ञ) जुइमाः । मनूतय्सं मेगु विकल्प दतले आत्महत्याया लँय् मवनेमाः धकाः अनया सरकारं अज्याःपिं मनूतय्त स्वयेगु निंतिं कोष दयेकाः ध्यबा तयातःगु दु ।

अस्ट्रियासिबें न्ह्यः स्विट्जरल्याण्डय् थुकियात वैधानिकता बिउगु खः । स्पेन, बेल्जियम, नेदरल्याण्डलिसें थीथी युरोपेली देसय् नं आत्महत्याया थ्व तरिकायात अपराधकथं कयातःगु मदु । तर चिकित्सकया अनुमति मदेयकं मेपिनिगु ग्वाहालि कयाः याइगु आत्महत्या धाःसा अस्ट्रियाय् गैरकानूनी खः । न्हूगु कानुनकथं मस्त व मानसिक ल्वय् दुपिंसं आत्महत्या यायेदइमखु ।

कानुनकथं थःगु जीवनया अन्त याये चाहे जूपिं वयस्कं थःपिनिगु स्वास्थ्य परीक्षण यानाः थःगु निर्णय थम्हं यायेत सक्षम जुइमाः ।
थुगु ईया दुने आत्महत्या यायेगु धकाः निश्चित जूपिंसं वाकिल वा नोटरीयात जानकारी बियाः प्राणघातक वासः नयेदइ । प्राणघातक वासःया दुरुपयोग मजुइमा धकाः आत्महत्या यायेत स्वःपिंसं वकिल वा नोटरीयात वासः पसःया जानकारी बिइमाःगु जुइ । थज्याःगु वासःया विज्ञापन यायेमदु ।

अस्ट्रियाय् आत्महत्या यायेत ग्वाहालि याइपिंत न्यादँया जेलया कानुनी व्यवस्था दु, तर संघीय अदालतं दछि न्ह्यः मनूतय्गु आत्मनिर्णय अधिकार कुण्ठित जूगु ठहर यासें मेपिनिगु ग्वाहालि कयाः थःत स्यायेगु पूर्ण प्रतिबन्ध चिकेत आदेश बिउगु खः ।

अस्ट्रियाया संसदं न्हूगु कानूनी व्यवस्था पारित जुइ न्ह्यः विपक्षीतय्सं आत्महत्या यायेत कानुनी झन्झट दुगु धकाः धाःगु खः । अथे हे छम्ह जक मनोचिकित्सकया मुल्याङ्कनं यायेगु निर्णय पर्याप्त मजू धासें थप प्रतिबन्ध तयेत मेमेगु दलतय्सं धाःगु खः । ( बीबीसी)

सम्बन्धित बुखँ

LEAVE YOUR COMMENTS