विश्व आदिवासी दिवसया तयारी
येँ (नेपालभाषा टाइम्स) – दँय्दसं अगस्त ९ तारिखकुन्हु विश्वन्यंकं ‘विश्व आदिवासी दिवस’ थीथी ज्याझ्वः यासे तःजिक हना वयाच्वंगु दु । थ्व हे झ्वलय् नेपालय् नं आदिवासी दिवस हनेगु निंतिं तयारी शुरु जूगु दु ।
नेपाल आदिवासी जनजाति महासंघ नेपाल (नेफिन)या ग्वसालय् थुगुसी ३२ क्वःगु विश्व आदिवासी दिवस हनेगु निंतिं तयारी याःगु दु । विश्व आदिवासी दिवसकुन्हु आदिवासी जनजातितय् परम्परागत, सांस्कृतिक व म्हसीका पिज्वइगु थीथी झाँकीया ब्वज्या यासें ¥याली व सांस्कृतिक ज्याझ्वः याइगु जूगु दु ।
महासंघया अध्यक्ष निमा लामा ह्योल्मों थुगुसी अगस्त ९ (साउन २४) गते चकं दबुलिइ (खुल्लामञ्चय्) स्वीन्याद्व स्वयां अप्वः आदिवासी जनजातित क्वकयाः अधिकार प्राप्तिया आन्दोलनया रुपय् दिवस हनेत्यनागु जानकारी बिउगु दु ।
महासंघया महासचिव विमल सारु मगरं थुगुसीया विश्व आदिवासी दिवसयात महासंघं बिस्कंकथं हनेगु ल्याखं चकं दबुलिइ हनेत्यनागु खँ कनादीगु दु ।
महासंघयाकथं स्वनिगलय् छक थ्यंमथ्यं नीगू लख स्वयां अप्वः आदिवासीत च्वनाच्वंगु दुसा दिवसया दिंकुन्हु स्वीन्याद्वःनिससें पीद्वःयात सहभागि याकेगु महासंघया योजना दु ।
नेपाल आदिवासी जनजाति महासंघ (नेफिन)या नं स्थापना दिवस हनेगु निंतिं ज्याझ्वःया तयारी यायेगु ल्याखं महासंघय् दुथ्याःगु थीथी जातीय घटक दथुइ च्वंगु मुँज्यां आदिवासी दिपस हनेगु विषयय् सहलह याःगु खः ।
बैठकय् महासंघय् आवद्ध नेवाः देय् दबूया नायः रश्मिला प्रजापति, नेपाल आदिवासी जनजाति पत्रकार महासंघ (फोनिज)या नायः लक्की चौधरी लगायतं थःथःगु सुझाव बियादीगु खः ।
संयुक्त राष्ट्रसंघं सन् १९९४ य् दँय्दसं अगस्त ९ या दिंयात अन्तर्राष्ट्रिया आदिवासी दिवसया रुपय् हनेगु घोषणा याःगु खः । विश्वन्यंकं थीथी देय्या आदिवासीतय्सं थःथःगु हे परम्परा, संस्कृति व हक अधिकारया संरक्षण, सुरक्षाया निंतिं थीथी ज्याझ्वः यानाः थ्व दिवस हनेगु याना वयाच्वंगु दु ।
राष्ट्रसंघं न्यूयोर्कस्थित थःगु मुख्यालयय् भर्चुअल माध्यमं थ्व दिवस हनेगु तयारी यानाच्वंगु दुसा थुगुसी दिंया ल्याखं ९ तारिख आइतवाः लाःगुलिं अगस्त १० सोमवाः जक ज्याझ्वः याइगु जुयाच्वंगु दु ।
राष्ट्रसंघं थुगुसीया निंतिं ‘आदिवासी धाईआमाहरूको सम्मानः जीवन र स्वास्थ्य-समृद्धिको संरक्षण’ धइगु नारा क्वःछिनातःगु दु ।
LEAVE YOUR COMMENTS