ने. सं. ११४६ दिल्लाथ्व दशमी -

यल महानगरपालिकाय् एआई कलिङ सेवा

येँ (नेपालभाषा टाइम्स) – यल महानगरपालिकाय् ‘एआई कलिङ’ सेवा संचालनय् हःगु दु । यल महानगरपालिका ३ वडाय् उकथंया ‘एआई कलिङ’ सेवा संचालनय् हःगु खः । ३ वडा ज्याकुथिं नागरिकया गुनासो संबोधन यायेगु व वडाया सेवा बारे जानकारी उपलब्ध याकेगु ल्याखं आर्टिफिसियल इन्टेलिजेन्स (एआई) प्रविधिया सेवा शुरु याःगु खः ।

३ वडा ज्याकूपाखें छगू पत्रकार सम्मेलन यासें नीप्यघौ हे सेवा बीगु ल्याखं ‘एआई कलिङ’ सेवा न्ह्याकागु जानकारी बिउगु खः । पत्रकार सम्मेलनय् वडाअध्यक्ष श्रीगोपाल महर्जनं ‘छिगु समस्या, जिगु समाधान’ धइगु नारा बियाः ‘एआई कलिङ’पाखें वडा ज्याकू दुनेया सकतां सेवा बारे जानकारी बीगु नापं वडा दुनेया समस्या ज्यंकेया निंतिं दर्ता यायेगु ज्या नं सफल जूगु खँ कनादिल ।

‘वडां बीगु सेवाया बारे एआई कलिङपाखें नीप्यघौ हे सेवा संचालन यानागु व थुगु एआई कलिङपाखें वडाया बारे छुं नं गुनासो दुसा व नं दर्ता यायेफइ’, वडाअध्यक्ष महर्जनं धयादिल, ‘जनप्रतिनिधि वा कर्मचारीयात सेवाग्राही व वडावासीं नाप लाये मखंगु अवस्थाय् एआईपाखें समस्या समाधान यायेत सहजीकरण जुइ । छुं नं ज्या वा सेवाया निंतिं दुःखः सियाच्वनेमाली मखु ।’

एआई कलिङपाखें आःयात खस् नेपाली भासं जक वडावासीया निंतिं माःगु सकतां सुचं बीगु व अनलाइनय् सः व आखलं गुनासो दर्ता यायेगु ज्या सम्भव जुइगु खःसा लिपा उकियात मल्टिपल एलएलएमय् चले जुइगुकथं प्रविधियात विस्तार यानाः मेमेगु भाय् नं तना यंकेगु ग्वसाः दुग वडाअध्यक्ष महर्जनं कनादिल ।

नेपालय् न्हापांखुसी वडा तहपाखें थुकथं प्रविधिया माध्यमं सेवा बीगु शुरु याःगु खः ।