चेन्नइलय् लःया अभावं रेल्वे स्टेशन, होटल बन्द

भारतया दक्षिण शहर चेन्नइलय् लः मदयाः रेल्वे स्टेशन निसें रेष्टुराँ बन्द जूगु दु । थन लः भण्डारण यानातःगु प्यंगू प्रमुख जलाशय क्षेत्र सुना वनेवं लःया तच्वःगु अभाव जूगु खः । लःया अभाव अप्वया वयेवं तुरुन्त समाधान मालेगु निंतिं न्हूगु थासय् गाः म्हुइगु ज्या जुयाच्वंगु दु ।
लः अभावया कारणं सरकारं ट्यांकरं वितरण याइगु लः कायेत तकं सर्वसाधारणयात घन्टौं लाइन च्वने मालाच्वंगु दु ।

‘चेन्नइयात थ्व अवस्थापाखें वा वल धाःसा जक बचे यायेफइ’ छम्ह सरकारी अधिकारीं धाःगु दु ।जनसंख्याया ल्याखं भारतया खुगूगु तःधंगु शहर जुयाच्वंगु चेन्नइलय् वंगु छुं वाः न्ह्यवनिसें लःया अभाव सुरु जूगु खः । लः भण्डारण यानातःगु तःगू जलाशय क्षेत्र सुना वनेवं शहरया यक्व हे होटल व रेष्टुराँ अस्थायी रुपं बन्द याःगु खः ।

लः बचे यायेगु निंतिं रेल स्टेशनतय्त वातानुकूलित यायेगु दिकाबिउगु दुसा कर्मचारीतय्त नं ज्याकुथिइ मवसे छेँय् हे च्वनाः ज्या यायेत धाःगु दु । ‘तर छेँय् नं लःया अभाव सु जूगु दु । थज्याःगु अवस्थाय् जिमिसं छु यायेगु’ आइटी वर्कर्स एशोसियसनया महासचिव भिनोथ कालिगाइं धाःगु दु ।

लःया अभावया कारणं स्थानीयतय् दथुइ ल्वापु नं सुरु जुया वःगु दु । वं वालय् जक लः इनेगु खँय् विवाद जुइवं जःलाखःलायात छुरीं सूम्ह छम्हेसित प्रहरीं ज्वलंगु दु । छम्ह सामाजिक अभियन्तां चेन्नइयात थ्व स्थितिं बचे यायेगु खःसा जमिन तःलय्या लःया सतह अप्वयेकेमाःगु खँ धयादीगु दु ।

सम्बन्धित बुखँ

LEAVE YOUR COMMENTS