माकःचिया कब्जाय् सहर

आतंककारी वा गुगुं नं देय्या विद्रोहीतय्सं सहर जक मखु, सत्ता हे कब्जा याःगु समाचार ला झीसं यक्व न्यनाच्वनागु खः । अथे हे माकःचां जाः प्यनीगु धइगु ला झीसं सिउ । माकःचां थथे जाः प्यनीगु धइगु थः शत्रुपाखें बचे जुइत खः । तर माकःचाः सहर हे कब्जा याःगु धइगु गुब्सं न्यने नंगु खँ मखु ।

तर हालसालय् युरोपया छगू देय्या सहर मुक्कं माकःचां कब्जा याःगु समाचार वःगु दु । युरोपेली देय् ग्रीसया एटोलिको नांया सहर छगुलिं माकःचां कब्जा याःगु खः । माकःचां सहर कब्जा याःगु धइगु आतंककारी वा विद्रोहीतय् पुचलं थें धाःसा मखु । माकःचां एटोलिको सहरन्यंकभनं हे जाः प्यनाः कब्जा याःगु खः ।

सहरया स्वां, सिमा, छेँ, सतक, भवन, मोटर, झाः पुखू, आकाशे ताँ आदि दक्वं थासय् माकःचां जाः प्यनाः सहर कब्जा याःगु खः । टेरान्गाथा नांया विशेष प्रजातिया तुयुपिं माकःचां जाः प्यनाः उकथं सहर कब्जा याःगु खः । जमिनय् स्वयां लखय् अझ अप्वः याकनं उखे थुखे जुइफुम्ह थ्व माकःचा धिकलं तसकं चिधकः जूसां थ्वं थःगु म्हयात रबर थें साला ताःहाकः नं याये फु ।

उकिं थ्व माकःचयात ‘स्टे«च स्पाइडर’ नं धायेगु याः । तर थ्व माकःचा मनूया निंतिं उलि हानिकारक धाःसा मखु । थ्व माकःचिया प्रजननदर नं मेमेगु प्रजातिया माकःचा स्वयां गाक्कं अप्वः दु । विज्ञतय् धापूकथं पत्तिया ल्याः अप्वया वनाच्वंगुलिं थ्व प्रजातिया माकःचाया प्रजनन दर नं अप्वया वनाचवंगु खः, छाय्कि थ्व माकःचिया मुख्य नसाज्वलं धइगु हे पत्ति खः ।