
एजेन्सी – आर्मिनिया व अजरबैजान दथुइ युद्धविराम सुरु जूगु छुं घौ लिपा हे हाकनं ल्वापु सुरु जूगु दु। विवादित नागोर्नाे काराबाख क्षेत्रया राजधानी स्टेपनाकर्टय् स्थानीय ई कथं शनिवाः बहनी बम मूगु प्रत्यक्षदर्शीत व आर्मिनियाया सञ्चारमाध्यमं धाःगु दु ।
निवाःया युद्ध लिपा निगुलिं देशं शुक्रवाः मस्कोय् वार्ता यासें अस्थायी युद्धविराम यायेगु सहमति याःगु खः । शनिवाः निसें हे लागू जुइ धाःगु युद्धविरामया पालना यायेत अन्तर्राष्ट्रिय समुदायं आर्मेनिया व अजरबैजानयात अपील याःगु खः । तर युद्धविरामया सहमति जूगु छुं ई लिपा विस्फोटया सः तायेदुगु खः ।
युरोपेली युनियनया विदेशनीति प्रमुख जोसेप बोरेलं थप गैरसैनिकत हताहत जूगु समाचारं थः तसकं चिन्तित जूगु खँ धयादीगु दु। निगू देय् दथुइ मध्यस्थता याःम्ह रुसी विदेशमन्त्री सेर्गेइ लाभ्रोभं युद्धविराम पूर्ण पालना जुइमाःगु खँ धयादीगु दु। वय्कलं टर्किया विदेशमन्त्री मेभलुत कोभुसोग्लुलिसे नं खँ ल्हानादीगु दु। टर्कि अजरबैजानया मू समर्थक जुयाच्वंगु दु।
आइतवाः नं स्टेपनाकर्टया स्थानीय अधिकारीतय्सं अन हाकनं गोलाबारी जूगु खँ धाःगु दु। थ्वयां न्ह्यः अजरबैजानया राष्ट्रपति इल्हाम अलियभं थःगु देय्या मेगु शहर गान्जाय् रकेट कयेकाहयेवं आर्मिनियायात युद्ध अपराधया द्वपं बिउगु दु। थन गुम्हेसिया ज्यान वंगु खँ स्थानीय अधिकारीतय्सं धाःगु दु ।
निगू देय् दथुइ ताःई न्ह्यवनिसें विवादय् लानाच्वंगु थ्व क्षेत्रयात कयाः सेप्टेम्बर २७ निसें हाकनं ल्वापु सुरु जूगु खःसा थ्व ल्वापुइ लानाः स्वसःम्हेसिया ज्यान वनेधुंकूगु दु। नगोर्नो काराबाख थौंकन्हय् आर्मिनियाया नियन्त्रणय् दुसा आधिकारिक रुपं थ्व थाय् धाःसा अजरबैजानया भूभाग खः ।
थ्वहे दथुइ अमेरिकी सेलिब्रिटी किम कार्दशियानं युद्धपीडित आर्मिनियालीतय् निंतिं १०लाख डलर चन्दा बीगु घोषणा सामाजिक सञ्जालय् याःगु दु। कार्दिशनया पुर्खा आर्मिनियाली खः ।
LEAVE YOUR COMMENTS