ने. सं. ११४४ चौलाथ्व दशमी -

बेलायतं नं हुवावेयात प्रतिबन्ध तल

एजेन्सी – अमेरिकाया तच्वःगु दबाब लिपा बेलायतं नं चिनिया कम्पनी हुवावेयात प्रतिबन्ध तःगु दु। बेलायती सरकारं वइगु ३१ डिसेम्बर लिपा हुवावेपाखें छुं नं कथंया उपकरण न्यायेत प्रतिबन्ध तःगु दुसा सन् २०२७ तकया दुने बेलायती मोबाइल प्रोभाइडर कम्पनीतय्सं थःपिनि नेटवर्कपाखें हुवावेया जी ५ किट चीकेमाःगु क्वःछिउगु दु ।

सरकारया थ्व निर्णयया बारे प्रविधि मन्त्री ओलिवर डाउडेनं हाउस अफ कमन्सयात बिउगु खः । वय्कलं सरकारया थ्व निर्णयं देय्न्यंकं ५ जी व्यवस्था लागू यायेत दछि लिज्यां वनीगु व थुकिं यानाः देशयात निगू अर्ब पाउण्ड थप आर्थिक भार लाइगु जानकारी नं बियादीगु खः । बेलायतं अमेरिकाया दबाबय् हे थ्व निर्णय याःगु अनुमान यानाहःगु दु। सन् २०२० या जनवरीइ जक बेलायत सरकारं हुवावेया ५ जी नेटवर्कयात संवेदनशील थाय् स्वयां पिने जक छ्यलेगु व मेमेथाय् नं ३५ प्रतिशत तक जक लागू यायेगु निर्णय याःगु खः ।

बेलायती सरकारं जनवरीया निर्णययात हाकनं बिचार यानाः प्रतिबन्ध हे तयेगु क्वःछिउगु खः । बेलायतया सरकारी अधिकारीतय्सं अमेरिकाया ट्रम्प प्रशासनं चिनिया कम्पनी हुवावेयात प्रतिबन्ध तयेगु निंतिं तच्वःगु दबाब बियाच्वंगुलिं हे बेलायती सरकारया थ्व न्हूगु निर्णय वःगु खँ धयाच्वंगु दु। अमेरिकां चीनं हुवावेया प्रविधि छ्यलाः जासुसी, खुँज्यया लिसें बेलायतय् आक्रमण तकं यायेफु धकाः धया वयाच्वंगु दु। अमेरिकां हुवावेयात न्हापा हे प्रतिबन्ध तयातयेधुंकूगु दु। हुवावें धाःसा अमेरिकां द्वपंयात अस्वीकार याना वयाच्वंगु दु। हुवावेया संस्थापकं ला यदि थः ग्राहकयात नोक्सान यायेगु खःसा कम्पनी हे बन्द याना बीगु बांलाः तकं धायेधुंकूगु दु ।