बेक्जिट लिछ्यायेत प्रधानमन्त्रीया सही मदुगु पौ

येँ – बेलायती प्रधानमन्त्री बोरिस जोनसनं युरोपेली संघ (इयु) त्वःतेगु बेक्जिट सम्झौताया निंतिं थप ई बीत इनाप यासें इयुयात पौ छ्वःगु दु । तर उगु पतिइ धाःसा प्रधानमन्त्री जोनसनं थःम्हं हस्ताक्षर यानामदी । कानुनी रुपं बाध्य जुइवं प्रधानमन्त्री जोनसनं इयुयात पौ छ्वःगु खः । प्रधानमन्त्रीं पौ छ्वःगु छुं ई लिपा हे मेगु पौ च्वयाः ई थप यातधाःसा गल्ती जुइ धकाः नं धाःगु दु ।

संसदय् वय्कलं सहमतिविना ब्रेक्जिट यायेगु प्रस्ताव पारित मजुइवं अक्टोवर ३१या ई थप यायेगु निंतिं इयुयात पौ च्वयेत प्रधानमन्त्री कानुनी रुपं बाध्य जूगु खः । इयु काउन्सिलया अध्यक्ष डोनाल्ड टस्कं ब्रेक्जिट सम्झौता लिछ्यायेगु इनाप सहितया पौ वःगु खँ ट्विट यासें धाःगु दु । वय्कलं आः गज्याःगु पलाः ल्ह्वनेगु बारे इयुया नेतातलिसे सहलह जुइगु खँ धयादीगु दु ।

प्रधानमन्त्री जोन्सनं हस्ताक्षर यानाः छ्वःगु लिपांगु पतिइ बे्रक्जिटयात लिछ्यायेगु धयागु गल्ती यायेगु जुइ धयागु थ ःगु व्यक्तिगत विश्वास दुगु खँ न्ह्यथनातःगु दु । उगु पतिइ इयुया नेतातलिसे जूगु सहमति कथं संशोधित ब्रेक्जिट सम्झौता पारित यायेत सरकारं कुतः याइगु व अक्टोवर ३१ दुने जुइगु खँय् थःत विश्वास दुगु खँ न्ह्यथनातःगु दु ।

प्रधानमन्त्री जोनसनं इयुयात ब्रेक्जिटया ई थप यायेत इनाप यायेगु स्वयांं थः संघर्ष यायां सिना वनेत तयार दुगु खँ धायेगु याना वयाच्वंगु खः । प्रधानमन्त्री जोनसनं छ्वःगु पौयात कयाः विवाद जुइगु धाःसा निश्चित दु । बिबिसीं धाःकथं थ्व पौयात कयाः नं आः अदालत वनीगु सम्भावना दु, अले अदालत थ्यन धाःसा याकनं हे सर्वोच्च तक नं थ्यनी ।

सम्बन्धित बुखँ

LEAVE YOUR COMMENTS