टेक्सासय् लरी दुने ४६ म्ह मनू सीनाच्वंगु लुइकल
एजेन्सी÷ अमेरिकाया टेक्सास राज्यया सान एन्टोनियोया पिने लाःगु थासय् दिकातःगु छगः लरी (ताःहाकःगु ट्रक)य् ४६ म्ह सीम्ह लुइकूगु दु । थ्व सीम्ह फुक्कं आप्रवासीतय्गु जूगु खँ धाःगु दु । उद्धारकर्तातय्सं लरीइ दुपिं मेपिं प्यम्ह मस्त सहित झिंखुम्हेसित अस्पताल यंकागु खँ धाःगु दु ।
लरीइ जीवित अवस्थाय् लूपिनि म्ह नं तसकं क्वानाच्वंगु खः । तसकं तांन्वःगुलिं उमित ‘हीट स्ट्रोक’ जूगु खँ धाःगु दु ।
सान एन्टोनियो अमेरिका व मेक्सिकोया सीमा स्वयां २५० किमि तापाक लाःगु थाय् खः । मानव तस्करतय्सं आप्रावासीतय्त अमेरिका दुत हयेगु निंतिं थ्व सहरया लँ छ्यला वयाच्वंगु दु । तस्करतय्सं अवैधानिक रुपं अमेरिका दुहां वइपिं आप्रवासीतय्त दुर्गम थासय् नापलानाः लरीइ तयाः शहरय् दुत हइगु खः । थथे हे शहरय् दुत हयाच्वंगु इलय् थुपिं सीगु अनुमान याःगु दु ।
सान एन्टोनियायो नगर प्रमुख रोन निरेन्बर्गं सम्भवतः बांलाःगु जीवन मालेगु झ्वलय् वःपिनिगु थ्व अवस्था छगू भयानक, मानवीय वियोग खः धाःगु दु ।
मंगलवाः छम्हेसिया सीम्ह लूगु खबर वयेवं आपतकालीन सेवाया कर्मचारीतय् सनिलय् ६ बजे घटनास्थलय् थ्यंगु खः । केएसएट टेलिभिजनया कथं उगु ट्रक रेलया लिक लिक्कसं लुइकूगु खः । प्रहरीं आः थ्व लरीया चालकयात मालाच्वंगु खँ धाःगु दु ।
शहरया दमकल सेवा प्रमुख चाल्र्स हुडया कथं लरी वातानुकूल दयेकातःगु व अन दुने त्वनेगु लः नं दुगु खँ धाःगु दु । तर ट्रक चायेका स्वयाबलय् सीम्हया सीम्ह खंगु धासें धाःगु दु, ‘जिमिसं थज्याःगु घटनाया कल्पना तकं मयानागु खः ।’
गर्मीया इलय् सान एन्टोनियोय् तसकं तांन्वइ । सोमवाः अनया तापक्रम ३९.४ डिग्री थ्यंगु खः ।
लुरी लुइकूपिं मध्ये अस्पताल यंकूपिं निम्ह ग्वाटेलमालाया नागरिक जूगु मेक्सिकोया विदेशमन्त्रीं धाःगु दु । मेपिं गन गनयापिं धयागु सीमदुनि । प्रहरीं थ्व घटनाय् स्वम्हेसित अनुसन्धानया निंतिं ज्वनातःगु खः ।
मेक्सिकोया महावाणिज्यदूतं यदि सीपिं मेक्सिकोया नागरिक जूसां माःगु फुक्कं ग्वाहालि यायेगु खँ धाःगु दु ।
थ्व शहरय् न्हापा नं थथे आप्रवासीत सिनाच्वंगु अवस्थाय् लुइकेधुंकूगु दु । सन् २०१७ य् सहरया दक्षिणय् लाःगु वालमार्टया पिने दिकातःगु थज्याःगु हे छगः लरीइ झिम्हेसिया सीम्ह लुइकूगु खः ।
घटनास्थल स्वयाः भचा तापाक सुरक्षाकर्मी कथं ज्या यानाच्वंम्ह एड्वर्ड रेनां थज्याःगु घटना जूगु खं थःत अजू मचाःगु खँ धाःगु दु । वया कथं लरी लूगु थासय् थःम्हं अप्वः धयाथें आप्रवासीत रेलं तिंन्हुया च्वंगु खनागु धाःगु दु ।
‘गुगुं नं इलय् सुं मनू बांमलाक घाःपाः जुइ धकाः जितः तायाच्वंगु खः । उमित हइपिं तस्करतय्सं थुपिं मनूत न्ह्यागु जूसां वास्ता हे याइमखु’, रेनां धाःगु दु ।
सान एन्टोनियोया सुदूर दक्षिण क्षत्रय् निपु मू राजमार्गया करिडोर दु, गुकिं टेक्सासया सीमाय् लाःगु नगरयात सहरलिसे स्वाइ । अप्वः थें गां लागा लाःगु थन पुलांगु सामान तयातःगु थाय् व भचाभचा विकास जुया वयाच्वंगु वस्ति जक दु । उकिं सान एन्टोनियायो उगु थासय् थज्याःगु लरी हःसां खास हे निगरानी मतइगु जूगुलिं तस्करतय्सं थ्व लँपु छ्यला वयाच्वंगु खः ।
थ्व घटनायात कयाः अमेरिकाया आन्तरिक सुरक्षा मन्त्रालय होमल्यान्ड सेक्युरिटी मन्त्री अलिहान्ड्रो माइयोर्कासं मानवतस्करतय्सं नाफा कमे याये ताः तयाः कमजोर मनूतय् शोषण यानाच्वंगु व उमित जोखिमय् लाकाच्वंगु खँ धाःगु दु ।
टेक्ससया गभर्नर ग्रेग याबटं थ्व मृत्युया निंतिं अमेरिकी राष्ट्रपति जा बाइडेनयात दोष बिउगु दु । एबोटों थ्व घटनायात बाइडनया ग्यानापुगु सीमानीतिया लिच्वः खः धाःगु दु ।
मध्य अमेरिकाया गरिबी व हिंसाया कारणं अनया मनूत तस्करतय्त कुगाक्क ध्यबा बियाः अमेरिका दुहां वयेगु कुतः याइगु खः । तस्करतय्सं मेक्सिकोया लँपु जुयाः जोखिमपूर्वक उमित अमेरिका दुत हयेगु याना वयाच्वंगु दु । थथे अमेरिका दुत हयेगु झ्वलय् न्हापा न्हापा नं आप्रवासीतय्सं यक्व सास्ति नयेमाःगु घटनात पिहां वःसां थुकथं छक्वलं हे तःम्ह मनूत सीगु घटना धाःसा जूगु मदुनि । यदि थ्व घटना मानव तस्करलिसे सम्बन्धित जूसा थ्व अमेरिकाया इतिहासया हे दकलय् खराब घटना प्रमाणित जुइगु खँ स्थानीय पत्रकारतय्सं धाःगु दु ।
LEAVE YOUR COMMENTS