कोरोनापाखें दक्षिणय् एसियाय् २,७७७म्ह संक्रमित, दकलय् अप्व पाकिस्तानय्

एजेन्सी – कोरोना भाइरस (कोभिड-१९)पाखें दक्षिण एसियाय् संक्रमिततय् ल्याः २,७७७म्ह थ्यंगु दु । संक्रमितत मध्ये दकलय् अप्व पाकिस्तान व दकलय् म्हो भुटानय् दु । कोरोना भाइरसपाखें पाकिस्तानय् १,४९५म्ह संक्रमित जूगु दुसा भुटानय् ३म्ह दु । अथेहे भारतय् ९८७म्ह, श्रीलंकाय् ११३म्ह, अफगानिस्तातय् ११०म्ह, बांलादेशय् ४८म्ह व माल्दिभ्सय् १६म्ह संक्रमित जूगु दु । नेपालय् म्हिगः छम्ह न्हूम्ह संक्रमित खनेवं थन संक्रमिततय् ल्याः ५म्ह थ्यंगु दु ।

अथेहे दक्षिण एसियाय् सीपिं ४६म्ह थ्यंगु दु । भाइरसपाखें सीपिनि ल्याः धाःसा पाकिस्तानय् स्वयां भारतय् अप्व दु । भारतय् आः तक २४म्ह सीधुंकूगु दु । अथेहे पाकिस्तानय् १२म्ह, बांगलादेशय् ५म्ह, अफगानिस्ताय् ४म्ह व श्रीलंकाय् छम्ह सीधुंकूगु दु । संक्रमण लिपा वासः याकाः छेँय् लिहांवंपिनि ल्याः धाःसा १४९म्ह थ्यंगु दु ।

आः तक हलिन्यंक ६६३,७४८म्ह संक्रमित जूगु दुसा ३०,८८० सीधुंकूगु दु ।

(ने. सं. ११४० चौलाथ्व ५ / वि. सं २०७६ चैत १६, आइतवाः)