समाचार वाचक रोबोट

प्रविधिया विकास थन तक थ्यने धुंकल कि, आः मनूतय्सं छुं हे ज्या यानाः नयेमाली मखुला धइगु आशंका यायेगु थाय् दया वःगु दु । धायेत्यनागु छु धाःसां थौंकन्हय् गुलि नं ज्या मनूतय्सं याना वयाच्वंगु खः, व दक्वं थासय् आः बुलुहुं बुलुहुं रोबोटं थःगु उपस्थिति क्यना हयाच्वंगु दु ।

थन बियातःगु छपाः किपा स्वयादिसँ, स्वयेबलय् छम्ह मनू थें च्वं । तर वास्तवय् व रोबोट खः । अले किपाय् मनूया आकृतिइ खने दुम्ह रोबोटं समाचार वाचन यानाच्वंगु खः । मनुखं याइगु मेमेगु ज्याय् रोबोटया उपस्थिति दइगुयात सामान्यकथं कायेगु थाय् दुसा समाचार वाचन यायेगु ज्या धाःसा मनुखं हे यायेमाःगु ज्या खः ।

तर प्रविधिया विकासया ख्यलय् चीनं छगू न्हूगु नमूना न्ह्यःने हयेगु झ्वलय् समाचार वाचन याइग रोबोट हे दयेकाः उकियात सार्वजनिक याःगु दु । चिनिया सरकारी समाचार संस्था ‘सिन्ह्वां’ संचारया क्षेत्रय् न्हूगु आयाम तनेकथं चछिन्हिछिं समाचार सम्प्रेषण यायेफुम्ह रोबोटयात ‘डेब्यू’ याःगु खः ।

सिन्ह्वां इन्टरनेट कन्फ्रेन्सपाखें उम्ह समाचार वाचक रोबोटयात सार्वजनिक याःगु खः । अंग्रेजी भासं समाचार बुलेटिन वाचन यायेगु झ्वलय् उम्ह रोबोट समाचार वाचकं दकलय् न्हापां ‘हेल्लो ! छिकपिंसं स्वयाच्वनादीगु दु, अंग्रेजी समाचारमूलक ज्याझ्वः ।

अले जि समाचार वाचक एआई । बेइजिंगपाखें’ नवाःगु खः । सिन्ह्वाया समाचार वाचक हाङ, योए थें दुरुस्त खने दुम्ह रोबोटं थःत प्रस्तुति नं धाथें हे समाचार वाचक खने दयेक याःगु खः । उम्ह रोबोट सिन्ह्वा व चिनिया सर्च इन्जिन कम्पनी ‘सोगोयुं’ दयेकूगु खः ।