इहिपा यायेत स्वंगू शर्त

मांअबुया कर्तव्य थः मस्तय् सुखद भविष्यया चिउताः कायेगु नं खः । मचा बुइकेगु व इमित ब्वलंकेगु जक मखु इमित लायक यायेधुंकाः नं इमिगु भविष्यप्रति मांअबुं उलि हे चिउताः कयाच्वनी । कायया निंतिं योग्यम्ह भौ व म्ह्याय् निंतिं उलि हे लायक व योग्यम्ह जिचाभाजु मालाः इमिगु भविष्य सुनिश्चित यायेगु मांअबुया कर्तव्य खः ।

थथे हे थःगु कर्तव्य पूवंकेया निंतिं थाइल्याण्डया छम्ह अबुं अजू चायापुगु घोषणा याःगु दु । छम्ह धनाढ्य व्यापारीं थः म्ह्यायलिसे इहिपा याइम्हेसित पुरस्कार स्वरुप थःगु सम्पत्तिया २ लाख ५० द्वः पाउण्ड (नेपाली स्वंगू करोड न्यय्गू लाख) बीगु घोषणा याःगु खः ।
उम्ह धनाढ्य व्यापारीं उलि जक मखसे थः म्ह्याय् नाप इहिपा याइम्ह मिजंयाके स्वंगू शर्त नं तःगु दु ।

५८ दँ दुम्ह अर्नोन रोडथोंग सिसाबुसाया व्यापारी खः । वं तःगु न्हापांगु शर्त खः मिजं स्मार्ट जुइमाः धइगु आवश्यक मदु, तर च्वये ब्वने याये सःम्ह जुइमाः । निगूगु शर्त मिजं लगनशील मेहनति जुइमाः । अथे हे स्वंगूगु शर्त खः मिजं तसकं कन्जुस जुइमाः व सिसाबुसायात तसकं माया याइम्ह जुइमाः ।

थाइल्याण्डया दक्षिण प्रान्त चुन्फोनय् च्वंम्ह व्यापारी रोडथोंगं थः म्ह्याय् कार्नसितालिसे इहिपा याइम्ह मिजंयात उगु सिरपाः बीगु व मिजंयाके दयेमाःगु गुण शर्तया रुपय् न्ह्यःने तःगु खः । २६ दँ दुम्ह कार्नसिता स्नातक तह तक अध्ययन यानातःगु व अंग्रेजी व चिनिया भाय् सःम्ह खःसा थौंकन्हय् थः अबुयात व्यापारय् ग्वाहालि याना वयाच्वंम्ह खः । उम्ह व्यापारीं थः म्ह्याय् आतक कुमारी हे जूगु धासें उकथंया घोषणा याःगुया लिउने थः म्ह्याय्या इहिपा मजूगुलिं चिउताः जुयाः खः ।

 

सम्बन्धित बुखँ

LEAVE YOUR COMMENTS