छम्ह युवा ज्योतिष । वं भविष्यवाणी याइ । निकट भविष्यय् भयानक भुखाय् ब्वइ । तःधंगु जनधनया क्षति जुइ । थुलि दुने भुखाय् ब्वइ । मिति नं बी । अझ थःगु भविष्यवाणी प्रति जनविश्वास थनेत वं धाइ, ‘जिगु भविष्यवाणी झूठ ठहर जूसा जिं गुगुं कथंया कठोर दण्ड फयेत नं तयार । जितः झुण्डे याःसां तयार ।’ थःगु भविष्यवाणी फेल नइमखु, वं आत्मविश्वास प्वंकी ।

प्यदँ न्ह्यव तिनि ग्यानापुगु भुखाचं तःधंगु दुःख कष्ट भोग यायेमाःपिं नेपाःमित । न्हूगु भविष्यवाणी न्यनी । आतंकित जुइ, ग्याइ । विनाशकारी भुखाय् ब्वइगु दावी यानाच्वंगु दु । पत्या यायेगु ला मयायेगु ला ? पत्या मयाये, धाथें ग्यानापुक भुखाय् ब्वःसा छु याये । गुलि हताहत जुइगु जुइ । मतिइ वइ, भुखाय् मब्वइ धाये मफु ।

भुखाय्या आक्रोश पूर्णतः स्खलन मजूनि हँ । धरती दुने वया तं मुनाच्वंगु दनि हँ । गुबलय् व दुने भण्डारण जुयाच्वंगु तं अकस्मात विस्फोट जुइ, भुखाय् पराकम्प जुयाः खनेदइ । भुखाय्–विद्तय्सं नं थज्याःगु ख्याच्वः बियाच्वनी । जनतायात सचेत यानाच्वनी । भुखाय् थुबलय् ब्वइ, निश्चित धायेफइ मखु ।

भूगर्भविदतसें धाइ, स्वनिगः भुखाय्या दृष्टिं जोखिमपूर्ण । थन भुखाय् ब्वइगु सम्भावना दइ । सदां दयाच्वनी । तर थन खँ सम्भावनाया मखु, युवा ज्योतिषं ठोकुवा यानाः धाइ, थुलि थुलि गते तःधंगु भुखाय् ब्वइ । अवश्यंभावी । भयानक क्षति जुइ । थःगु भविष्यवाणीया प्रचार प्रसार याइ । सामाजिक संजालय् भविष्यवाणी भाइरल जुइ ।

प्रशासनं युवा ज्योतिषयात आतंक न्यंकाः जनतायात असुरक्षित व त्रसित याःगु अपराधिक कार्यय् संलग्न जूगु द्वपं बियाः ज्वनी । कुनाबी ।
मत्ती तये, फय्गं भविष्यवाणी यानाः जनतायात आतंकित याना जूम्ह युवा ज्योतिषयात प्रशासनं ज्वनाः कुनाबिल । जनतां जरुर नं प्रशासनया थ्व कार्ययात स्वागत याइ, प्रशंसा याइ । अनुमान याये ।

भुखाय् ब्वइ धकाः जनतायात आतंकित याःम्ह ज्योतिषयात कुने फुम्ह सरकारं देशया सम्पत्ति थःगु याना कायेत स्वइपिं भूमाफिया, आतंककारीतय्त गय् छुट बिल ? थ्व तसकं हे शंकास्पद खँ जुयाबिउगु दु ।

तर जनताया प्रतिक्रिया जिं अनुमान यानाकथं जुइमखु, बरु अःखः जुइ । भुखाय् ब्वग्ु भविष्यवाणी याना जूम्ह युवा ज्योतिषयात अपराधी खंकेगु, कुनेगु गलत कार्य खः प्रशासनया । सामाजिक सञ्जालय् यक्वस्यां प्रतिक्रिया बी । असन्तोष व्यक्त याइ ।जनतां न्ह्यसः तया हइ– जहाज, रेल छेँय् छेँय् ग्यास वइन, वइन धकाः फय्गं भविष्यवाणी याःपिं नेतातय्त अपराधि खंके माः लाकि म्वाः ?

जिम्मेवार नेतातसें थःगु वाचा, भविष्यवाणी प्रति दायित्व वोध याये म्वाःसा युवा ज्योतिषयात दोषी खंकाः दण्ड बीगु न्यायोचित जुइ ला ? मेलम्चीं लः वइन वइन धकाः जनतायात दँ दँ झंगः लाइ । झूठ झूठ आश्वासनय् फसेयानाः जनतायात ध्वं लाइपिंत दण्डित याये माः लाकि म्वाः ? योजनावद्ध कथं जनतायात लःया आश क्यनाः ध्वं लानाच्वंपिंत सरकारं छु गुकथं कसा यात ?

लः त्वने मखनाः कथु गंपिं जनतातसें सीके चाहे जुइ । लँय् वनेबलय् धू व कुंया दथुइ सासः ल्हयोमाः । कुँत्या पिकयाः मोटरत ब्वाका च्वनी, छम्ह जिम्मेवार नेतां बकंफुस्लु खँ ल्हाइ । धाइ– आः वातावरण शुद्ध जुइधुंकल । ख्वालय् मास्क तयेमाःगु आवश्यक्ता मन्त । थौं वातावरण पूर्णतयाः स्वच्छ जुल, मास्कतये म्वाःल धकाः गुगु दावा सरकारी उच्च पदय् च्वंपिंसं याइ, व फताह खँ मखुला ?

भुखाय् ब्वइ धकाः जनतायात आतंकित याइम्ह ज्योतिषयात जेल चलान यात हँ । अले खुलम खुल्ला मखुगु खँ ल्हानाः जनताया मिखाय् धुलं छ्वाकीपिं नेतातय्त गय् क्षम्य जुइ दइ ? थांै देशय् सार्वजनिक जग्गा, गुथिया जग्गाय् सरकारया लिधंसाय् भूमाफियातसें मिखा तयेधुंकूगु दु ।

गुलिखे जग्गा सार्वजनिक गुथिया जग्गा थौं माफियातसें थःगु याये धुंकूगु दु । थ्व माफियातय् जग्गा आतंकं राज्यया सम्पत्ति अमूल्य सम्पदाय् तःधंगु भुखाय् ब्वयेके धुंकूगु दु । देश थौं तःधंगु विपद अवस्थाय् लायेधुंकूगु दु । विडम्बना ! सार्वजनिक राज्यया जग्गा, गुथिया ज ग्गा संरक्षित जुइमाः धकाः सः थ्वयेकूपिं जनतायात पुलिसं भकूमार कथं यातना बिउगु दु ।

भुखाय् ब्वइ धकाः जनतायात आतंकित याःम्ह ज्योतिषयात कुने फुम्ह सरकारं देशया सम्पत्ति थःगु याना कायेत स्वइपिं भूमाफिया, आतंककारीतय्त गये छुट बिल ? थ्व तसकं हे शंकास्पद खँ जुयाबिउगु दु ।

सम्बन्धित बुखँ

LEAVE YOUR COMMENTS