ने. सं. ११४६ दिल्लागा दुतिया -

धर्मचक्र प्रवर्तन दिवसय् नसंचा उलेज्या

ख्वप (नेपालभाषा टाइम्स) – बौद्ध संघ ख्वपया ग्वसालय् वंगु दिल्लाथ्व पुन्हि, असार पुन्हिलिसें धर्मचक्र प्रवर्तन दिवसया लसताय् नसंचा उलाः नगर परिक्रमा याःगु दु । संघया ग्वसालय् २६१५ क्वःगु धर्मचक्र प्रवर्तन दिवस लिसें गुरुपुन्हिया लसताय् बुद्धमूर्ति सहित नसंचा उलाः नगर परिक्रमा याःगु खः ।

बुद्ध मूर्तियात खतय् तयाः परम्परागत बाजंसहित नगर परिक्रमा याःगु खः । बौद्ध समकृत विहार (कुथुबही, दूधपाटीं) न्ह्याःगु नसंचा उलेगु इताछेँ, खौमा, ख्वप लाय्कू, यालाछेँ, ब्यासी, च्वछेँ, भोलाछेँ, महालक्ष्मी, थालाछेँ, साःक्वलां, गःछेँ, सुर्जमरि, तौलाछेँ, तचपाल, दत्तात्रय, इनाचो, सुकूध्वाखा, तःमरि, गःहिति, नासमना, वंशगोपाल, तेखाच्व, भार्वाच्व जुयाः दूधपाटीस्थित विहारय् थ्यंकाः क्वचायेकूष्गु खः ।

बौद्ध परम्पराकथं शाक्यमुनि तथागत भगवान बुद्धं बोधिज्ञान प्राप्त यानाबिज्यायेधुंकाः न्हापांखुसी पञ्चभद्र वर्गीय न्याम्ह भिक्षुपिंत धर्मदेशना बियाबिज्याःगु दिंया लुमन्तिइ दँय्दसं दिल्लाथ्व पुन्हिकुन्हु धर्मचक्र प्रवर्तन दिवस हनेगु याना वयाच्वंगु दु ।

बौद्ध धर्मावलम्बितय्सं अतिकं आस्था तयाः हना वयाच्वंगु थ्व दिवस ख्वपय् २०४५ सालनिसें हनेगु शुरु जूगु खः । उगु इलय् युवा बौद्ध पुचः ख्वपया ग्वसालय् २५७७ क्वःगु धर्मचक्र प्रवर्तन दिवसया लसताय् लाकाः पुचलं थ्व दिवस हनेगु शुरु याःगु खः । उगु इलय् पुचःया ग्वसालय् ख्वप लाय्कूस्थित फसिदेगः (सिलु महाद्यः) या देगः न्ह्यःनें शुरु जूगु नसंचा उलाः नगर परिक्रमा याःगु खः । थौंया दिं तक थ्यंगु इलय् थ्व परम्परा ३८ दँ दयेधुंकूगु दु ।

नसंचा उलेज्याय् ख्वप देय् दुनेया थीथी बौद्ध धार्मिक संघसंस्था, सामाजिक संघसंस्था, स्थानीयवासी, उपासक उपासिकालिसें थीथी ख्यःया व्यक्तित्वपिनिगु सहभागिता दुगु खः । समापन ज्याझ्वलय् बौद्ध संघ ख्वपया संस्थापक नायः संघरत्न शाक्यं ज्याझ्वः ताःलाकेत ग्वाहालि यानादीपिं सकसितं सुभाय् देछानादीगु खः ।

थ्व झ्वलय् दिल्ला पुन्हि, असार पुन्हिनिसें थीथी विहारय् च्वनाबिज्याःपिं भिक्षुपिनिगु परम्पराकथं स्वलाया वर्षावास नं शुरु जूगु दु ।