जिं म्हसिउम्ह जगमोहन बाज्या

सुनिता मानन्धर

सुथ न्हापां फेसबुक चायेकाःस्वयेवं किपा छपाः खन । चट्ट च्वंक् कोट फिनातःम्ह, सदां स्वस्थ व हृष्टपुष्ट पह वःम्ह जगमोहन वामि बाज्याया किपा । किपा खनेवं अन छु च्वयातल स्व हे मस्वसें । छथुं मती लुल — ‘अहो ! थौं बाज्याया बुदिं जुइका, उकिं किपा तयातःगु । बुदिंया भिंतुना धाये माली ।’ मती तया थें कमेन्ट बक्सय् दुहां वनाः अन च्वयातःगु खना — ‘विचाः हायेका ।’ पलख जितः छु याये छु याये थें जुल । मिखा लःलः धाल । अय्नं जिं च्वयाबिया – ‘निर्वाण कामना ।’

जगमोहन बाज्या जि झिदँ ति दुबलय्निसें म्हसिउ । अबलय् उलि खँ ल्हायेम्वाः । वा देशय् चमाया छेँय् वनेबलय् नाप लाइगु । सकसिनं चिबाः धाइगु । जिं खसांनिसें वय्कः सदां चट्ट च्वंक वसः पुना जुइम्ह । थःगु हे कथंया फुर्ति ज्वना जुइम्ह ।

जिं उघ्रिमय जिमि चिरिब्वा (लक्ष्मण बाः)यात फोन याना । वय्कलं नं जगमोहन बाज्या मदुगु खँ कनादिल । वय्कलं धयादिल, ‘जिं म्हीग तिनि फोनय् खँ ल्हानागु । विरामी थें नं मच्वं । न्हापा लिपा थें याउँक हे खँ जुल । छु जुयाः मदुगु जिं नं मसिउ नि । ११ बजे पशुपतिइ हये धाःगु दु ।’

जिपिं ११ बजे ती पशुपतिइ थ्यंकः वना । अन आपाः मनूत मथ्यंनि । वय्कःया काय डा. भाष्कर व सत्यमोहननाप च्याम्ह झिम्ह ति जक खना । छुं ई लिपा मदनकृष्ण श्रेष्ठ झायादिल । पलख च्वनाः वय्कः लिहां झाल । जगमोहन बाज्या छु जुयाः मदुगु न्यने मास्ति वः, तर न्यनेगु सुयात ?
वय्कलं जितः इलय् व्यलय् फोन नं यानादी । ‘जि ला सुथसिया न्याताः इलय् भजन भण्डलीइ थ्यनी का मैं ।’ वय्कःया खं छगूकथंया उर्जा ब्वलंका बी ।

थौंकन्हय् वय्कःया जीवनशैली साधारणकथं न्ह्यानाच्वंगु दु । सदां सुथसिया प्यताः इलय् दनाः थःगु नित्यकर्म क्वचायेकादी । थः द्यनागु खाताया लासा, फांगा, फ्वंगा, सिलः दक्व थम्हं मिले यानादी । दनेवं लासा मिले यायेगु वय्कःया न्हियान्हिथंया ज्या थें जुइधुंकल । अनंलि क्वाःलः भपियाः छेँय् नं पिहां वइ । छेँ पिनेसं च्वंम्ह भैरद्यः भागि यानाः वज्रवाराहीइ झाइ । अन द्यः चाःहिलाः द्यः भागि यायेधुनेवं भजनमण्डलय् झाइ । अन मस्तय्त हार्मोनियम, तबला नापं भजन हालेगु स्यना बी । थ्व वय्कःया नित्यकर्म थें जुइधुंकल ।

सदां सुथ न्हापां दनाः पिहां झाइम्ह वय्कः उकुन्हु पिहां मझायेवं वय्कःया काय (डा. भाष्कर) वय्कःया क्वथाय् स्वः झाल । वय्कः खाताया क्वसं फ्यतुना च्वंगु खन । नापसं लःया गिलास नं दु । न्ह्यःने वनाः स्वः झाःबलय् वय्कः मदयेधुंकूगु जुयाच्वन । वय्कःया लासा, फांगा, फ्वंगाः, सिलः दक्वं चट्ट च्वं । वसः नं चिटिक्क च्वंक फिनातःगु दु ।

वय्कःया काय डा. भाष्करं कनादिल — ‘न्हियान्हिथं थें थःगु ज्याखँ क्वचायेकाः क्वाःलः भपीत कयादीगु जुइ । लः त्वनाः वा त्वने हे मलायेकं मंत जुइमाः । वय्कःया ख्वालय् छुं कथंया थाकु पहः मदु । खाताया क्वसं छ्यं क्वछुनाः फ्यतुना च्वंम्ह थें च्वं !’

थौंकन्हय् वा देशय् उलि वने नं म्वाःल । वय्कः थुखे (येँय्) नं उलि झाये मफुत । उकिं वय्कःयात नाप लायेगु म्हो जक जुल । छुं दँ न्ह्यः वय्कःयात लहना वापौया छगू ज्याझ्वलय् नाप लाःगु खः । अबलय् वय्कलं धयादीगु खः — ‘भगवानया कृपां थौंतले छुं कथंया ल्वय् मदु । थ्व ल्हाः भचा जक थरथर खाः का । हाकनं हार्मोनियम, तबला थायेबलय् छुं मजू सिउला ?’

वय्कलं नसायात द्यवं बिउगु वरदान तायेकादी । उकिं नसा हन्ताः मयासे माछि जक कयाः नयेमाः धकाः सकसितं कनाच्वनादी । थुकथंया उच्च विचाः दुम्ह वय्कःया जीवनशैली नं धाथें साधारण । वय्कः थम्हं सः सिउगु ज्याखँ सकसितं स्यना बीत सदां तयार जुयादी । न्ह्याथेंज्याःगु परिस्थितिइ नं आखः ब्वनेमाः धइगु विचाः दुगु कारणं यानाः वय्कलं थः सन्तानयात उच्च शिक्षा हासिल याकल । अझ वा देशय् उच्च शिक्षाया लागि कलेज नीस्वनेगु ज्याय्तकं वय्कः न्ह्यचिलादिल ।

कर्म बांलाक याःसा जीवन नं याउँक न्ह्याइ धइगु विश्वास यानादीम्ह वय्कःया जीवनय् नं थथ्याःक्वथ्याः वल हे जुइ । थः जहान मदुगु दछि लिपा हे अतिकं सहज रुपं थःगु मृत्युया लुखाय दुहां झाल । फुबलय् यायेमाः लिपा याये फइला मफइला धइगु थःगु धारणायात सी न्ह्यः तनक थःगु सकतां कर्म क्वचायेकादिल । अmभ वय्कलं थःगु मिखा दान यानाः मृत्यु लिपा नं संसार खंका दिल ।

सम्बन्धित बुखँ

LEAVE YOUR COMMENTS