अमेरिकायात इरानया ख्याच्वः

तेहरान – इरानया संसदया सभामुख मोहम्म बाघेर गालिबाफं केशम टापुया आवासीय क्षेत्रय् अमेरिकां याःगु आक्रमणया कडा भत्र्सना यासें ख्याच्वः नं बिउगु दु । केशम टापुया आवासीय क्षेत्रय् जूगु अमेरिकी आक्रमणयात सर्वसाधारणयात कयाः जूगु ‘आतंकवादी आक्रमण’या संज्ञाबिसे अमेरिकां निर्दोष नागरिकया हि बाः वयेकूगु द्वपं नं सभामुख गालिबाफं बिउगु दु ।

गालिबाफं अमेरिकां थुकिया तःधंगु मू पुलेमालीगु ख्याच्वः नं बिउगु दु । सामाजिक संजाल एक्सपाखें प्रतिक्रिया बिसें गालिबाफं केशम टापुया घटना मिनाब व लामर्डय् जूगु पूर्व घटनाया हे निरन्तरता जूगु दावी नं याःगु दु । गालिबाफं अमेरिकां युद्धभूमिइ फयेमाःगु असफलताया क्षतिपूर्ति निर्दोष नागरिकयात आक्रमण यानाः यायेत स्वःगु द्वपं बिसें इरानं नं थुकियात कयाः कडाः लिसः बीगु ख्याच्वः बिउगु दु ।

थुखे अमेरिकी सेनां इरानय् रिभोलुसनरी गार्ड कोप्र्सया सैन्य पूर्वाधारयात लक्षित यानाः व्यापाक आक्रमण यानागु दावी याःगु दु । अमेरिकी केन्द्रीय सैन्य कमान्ड सेन्टकमं गालिबाफया प्रतिक्रियायात लिसः बिसें इरानय् गार्ड कोप्र्सया सैन्य कमान्ड केन्द्र, क्षेप्यास्त्र व ड्रोन केन्द्र, तटीय निगरानी व रक्षा संरचना लिसें समुद्री सैन्य क्षमतालिसे सम्बन्धित थाययात जक निशाना दयेकागु धाःगु दु ।

इरानया गार्ड कोप्र्सया दर्जनौं लक्ष्यय् ततःधंगु सैन्य कारवाही सम्पन्न यानागु सेन्टकमं धापू वयेवं गालिबाफं उगु प्रतिक्रिया बिउगु खः ।