उर्जामन्त्री व कार्यवाहक प्रमुख दथुइ सहलह
येँ (नेपालभाषा टाइम्स) -उर्जा, जलस्रोत व सिँचाइ मन्त्री विराजभक्त श्रेष्ठ व येँ महानगरपालिकाया कार्यवाहक प्रमुख सुनिता डंगोल दथुइ सहलह जूगु दु । मन्त्री श्रेष्ठ व कार्यवाहक प्रमुख डंगोल दथुइ येँ देय्यात झः झः धायेकेगु खँय् अन्तरसम्बन्धित ज्याझ्व कार्यान्वयन यायेत समन्वय व सहकार्य यायेगु विषयय् सहलह जूगु खः ।
वय्कःपिनि दथुइ मन्त्रालयय् जूगु भेटघाट व खँल्हाबल्हाया झ्वलय् सम्पदा क्षेत्रय् तयेगु मत व प्रकाश व्यवस्थापनया मापदण्ड तयार यायेत मन्त्रालय व महानगरपालिकाया मंकाः पुचः गठन यानाः ज्या यायेगु सहमति जूगु खः ।
थ्व झ्वलय् येँय् म्हो जुजुं वनाच्वंगु भूमिगत लःया सतहयात तथ्यया लिधंसाय् पुनःभरण यायेगु अभियान न्ह्याकेगु, जैविक फोहरपाखें उर्जा उत्पादन ज्याझ्वःया निंतिं थ्व हे दँय् नमूना परियोजना कार्यान्वयय् हयेगु विषयय् सहलह जूगु खः । अथे हे वय्कःपिनि दथुइ विद्युत प्राधिकरण व महानगरपालिका दथुइ बक्यौता सम्झौताया विषय् तक्यनाच्वंगु समस्या वैज्ञानिक समाधान मालेगु, उर्जा व सहरी व्यवस्थापन सम्बन्धय् थवंथवय् दायित्व सहकार्य यायेगु लगायतया विषयय् नं सहलह जूगु खः ।
मन्त्री श्रेष्ठं येँ महानगरपालिकां न्ह्याकूगु नविनतम व नवप्रवर्तनय् आधारित ज्याझ्वःयात मन्त्रालयं न्ह्याबलें ग्वाहालि यानाच्वनेगु प्रतिवद्धता प्वंकादीगु खः ।
खँल्हाबल्हाया झ्वलय् कार्यवाहक प्रमुख डंगोलं विद्युत प्राधिकरणयात येँ महानगरं पुलेमाःगु बक्यौता पुलेत तयार दुगु धासें उकिया निंतिं प्राधिकरणं नं यथार्थ बिल बीमाः धयादिल ।
सहलहया झ्वलय् येँ महानगरं अभियानया रुपय् न्ह्याकूगु योजना भूमिगत लः पुनःभरण ज्याझ्वःलिसे संघीय सरकार अन्तर्गतया ज्याकूया सहभागिता, बहनिसिया इलय् येँया सतक खिउँसे च्वंके मबीगु थेंज्याःगु अभियानय् थवंथवय् दायित्व, सहकार्य लगायतया विषयय् मुख्य रुपं केन्द्रीत जूगु खः ।
LEAVE YOUR COMMENTS