तथागतयात यःगु पुजा

सकसिनं सुथय् द्यः पुज्यायेमाः । हिन्दू जुइमा वा बौद्धमार्गी । सुथ न्हापां द्यः पुमज्यासें मजिउ । द्यः क्वथा दइ । द्यःक्वथा मदुसां द्यःपिं झ्वःलिक तया तइ । अन लक्ष्मीद्यः, भिंद्यः, ससुद्यः, गणेद्यः, महाद्यः अझ बुद्धया मूर्ति तकं तया तइ । अझ थःपिं गनं द्यःया थासय् वंसा अनया ल्वहं हयाः थःगु छेँय् द्यःकथं पलिस्था याइ ।

द्यःपिंत जल बी । सिन्हः तिकी । स्वां छाइ । फुलफुल, जाकि, बजि देछाइ । थुकथं द्यः पुज्यायेगु नित्य कर्म खः । द्यःपिंत मनकुसें थःपिंसं नये मजिउ । द्यः द्यांलाके मजिउ । उकिं द्यः पुज्यायेमाः । थ्व झीत अजाअजिं स्यनातःगु । यदि सुनानं द्यः पुमज्यात धाःसा वयात नागःतुगः याइ । परम्परा स्यंकल ।

द्यः छम्ह तकं पुज्यानाः नये मफुम्ह, वयात अलछिन कथं काइ । उकिं थन गुलिसिनं आस्थां द्यः पुज्याइ । गुलिसिनं परम्परायात निरन्तरता बीकथं जक द्यः पुज्याइ । बुद्ध शिक्षा कथं पुजा यायेगु धयागु मानसत्कार यायेगु गौरव तयेगु खः । थुकी निगू कथं दु । आमिस पुजा व पटिपत्ति पुजा वा धर्मपुजा । झीसं सुथं न्हापां दनाः गुकथं द्यः पुज्यानाच्वना, व आमिस पुजा खः ।

थन झीसं पटिपत्ति पुजा व आमिस पुजा गुकथं यानाच्वना धयागु खँय् उला स्वये । झीगु समाजय् मांबौपिं नाप ब्यागलं च्वनेगु परम्परा ब्वलंगु दु । मांबौपिंत पुलांगु छँेय् तयेगु । थःपिं न्हूगु छेँ दनाः च्वं वनेगु । न्हूगु छेँया जग तयेगु इलय् मांबौपिं म्वाः । न्हूगु छेँय् दुहां वनेगु इलय् मांबौपिं ल्वःमं । न्हूगु छेँय् मांबौपिंत क्वथा मदु । थाय्बाय् मदु ।

तर उगु छेँय् द्यःक्वथा बांलाक दयेकी, बांबांलाःपिं द्यःपिनि मूर्ति तइ । मतं झिलिमिलि धायेकी । न्हियान्हिथं द्यःपिंत सिसाबुसा छाइ । अनेतने ब्यञ्जनं पुजा याइ । तर थःपिंत जन्म बिउपिं मांबौपिंत स्याउ छगः नकेयंकी मखु । उमि जा नयाच्वंगु दु मदु वास्ता मदु । थः माचाछि दुने मांबौ दुमथ्याः । थः मस्तय्त नं द्यः पुज्यायेगु स्यनी ।

परम्परा न्ह्याकेत, द्यः पुज्यायेगु मखु । द्यः धयाम्ह सु खः ? द्यः छाय् पुज्यायेमाः ? द्यः पुज्यानां छु प्राप्त
जुइ ? थ्व सकतां खँ थुइकाः जक पुजा यायेमाः । तथागत बुद्धं बुद्ध शिक्षायात व्यवहारय् छ्यःसा जक तथागतया पुजा जुइगु खँ कनाबिज्याःगु दु ।

तर आदर सत्कार यायेगु स्यनी मखु । बुद्ध शिक्षा कथं मांबौयात ब्रम्हा कथं कयातःगु दु । ब्रम्हा संसारया सृष्टिकर्ता । दकलय् च्वय्या द्यः । थज्याःम्ह द्यःयात त्वःताः मेपिं द्यःपिंत पुज्याइ । थुकिं झीत पूण्य प्राप्त जुइ ला ? अझ बौद्धग्रन्थय् मांबौया सेवा याःपिं सन्तानपिनि खँ न्ह्यथना नं तःगु दु । उमिसं संसारयात त्याकूगु दु ।

स्वर्गलोक प्राप्त याःगु दु । मंगलसूत्रय् नं मांबौया सेवा यायेगु उत्तम मंगल खः धयातःगु दु । द्यःपिनि मन्दिरय् वनीगु जक मखु । द्यःयात भाकल यात कि थःगु मनोकामना पूवनी धइगु विश्वास नं दु । उकिं थःगु इच्छा पूवंकेत थीथी कथं भाकल याइ । गुलिसिनं द्यःयात लड्डु छाये धाइ । गुलिसिनं प्यारा छाये, गुलिसिनं मत च्याके धकाः भाकल याइ ।

अझ गुलिसिनं ला झन् पशुबलि बीगु धकाः भाकल याइ । छुं ई काल लिपा इच्छा पूवनी । अले थम्हं भाकल यानाम्ह द्यःयाथाय् वनी । अन थःगु भाकल कथं खा, हेँय्, फैचा आदिया बलि बी । उमिगु ला प्रसाद कथं ग्रहण याइ । तर बुद्धशिक्षा कथं प्राणीया हत्या याये मजिउ । प्राणी हिंसा यात कि उकिं पूण्य प्राप्त जुइगु मखु ।

बरु थः नं उकथं सिना वनेमाली । पापभोग यायेमाली धयागु खँ उलातःगु दु । थुकथंया कर्मया विपाकं थःत सलंसःदँ तक लित्तुलिनाच्वनी धयागु खँ जातकय् कनातःगु दु । मनूया शरीर सदां उत्थें जुइ मखु । थौं स्वस्थम्ह कन्हय् ल्वचं कइ । ल्वचं कइगु इलय् गुम्हं लांलां लासाय् लाइ । गुम्हं दँ दँ तक छग्वारा चिनी ।

थुगु इलय् ल्वगि सकसियां मिखाया धू जुइ । वयात बिचाः याइपिं सुं दइमखु । सुनानं वया सुसाःकुसाः याइ मखु । ल्वगियात ध्याकुनय् वांछ्वइ । थुगु इलय् छेँजःपिंसं द्यः पुज्यायेगु त्वःती मखु । द्यइके वनेगु दिकी मखु । ल्वगियात न्हियान्हिथं खि–च्व यानाः वाना तइ, ल्वगियात इलय् वासः नकी मखु । तर द्यःक्वथा यचुपिचु याइ ।

द्यःयात जाकि बजि सिसाबुसा छाना जुइ । बुद्ध शिक्षा कथं स्वयेगु खःसा थुकथं द्यः पुज्यायेगु धात्थेंगु पुजा मखु । तथागत बुद्धं धयाबिज्याःगु दु, गुम्हेसिनं ल्वगिया सेवा याइ, वं जिगु सेवा याःगु खः ।खय्त ला थुगु खँयात वाःचायेकाः पुजा याःपिं नं दु। बुद्धकालया सुप्रिया उपासिका । व विहार विहारपतिकं चाःहिल ।

गन गन ल्वगि भिक्षुपिं दु, अन अन थम्हं हे उमिगु सेवा यात । अझ छक्वः ल्वगि भिक्षुया लागिं सुप माल । थुगु इलय् थःगु ला ध्यनाः उकिया सुप दयेकाः तकं नकल । थुकथं ल्वगिया सेवा याःगु कारणं वं निर्वाण फल प्राप्त यायेफत ।धर्म मुनेगु छगू लँपु ग्वाहालि यायेगु नं खः । थःगु गच्छेकथं माःम्हेसित माःकथं ग्वाहालि यायेगु ।

नये मखंम्हेसित नकेगु । प्याःचाःम्हेसित त्वंकेगु । थ्व हे दकलय् तःधंगु धर्म खः । थुकिया लागिं लखौंलख फुकेमाः धयागु नं मदु । जाकि छम्हू जक दान बिउम्ह नं स्वर्गलोक त्याकेफु । बोधिसत्वपिंसं ला झन थःगु ज्यानया आहुति तकं बिउगु दु । द्यः पुज्यायेगु नं बार कथं द्यःपिं ब्वथली । गुलिं द्यः मंगलवाः पुजा यायेमाः, गुलिं शनिवाः ।

गुलिं बिहिवाः । थुकथं वारकथं द्यः पुज्याःसा लाभदायी जुइगु विश्वास दु । उकिं मंगलवाः जुल कि गणेद्यःयाथाय् म्वःम्वः जुइ । बिहिवाः जुल कि बंगलामुखीइ झ्वःछूवनी । अझ सु द्यःयात छुकिं पुज्यायेमाः, छु देछायेमाः धयागु विधि नं दु । विधि कथं द्यः पुज्यायेमाः । थुकिं सुख प्राप्त जुइगु विश्वास दु ।

थुकथं विश्वास थौंया जक मखु, परापूर्वकालंनिसें न्ह्यानाच्वंगु खः । तर बुद्ध शिक्षाय् थुकथंया पुजायात थाय् बियातःगु मदु । बुद्ध स्वयमं आनन्दयात थथे धयाबिज्याःगु दु— आनन्द, जि तथागतयात पुजा यायेवं जक पुजा याःगु जुइ मखु । उत्तम धर्मयात आचरण यायेगु विधिपाखें पुजा याःसा जक सर्वोत्तम पुजा याःगु जुइ ।

बुद्ध शिक्षाय् थःगु कर्तव्य पालना यायेगु हे पुजा यायेगु खः । अशुभ कुकर्म मयायेगु हे सत्मार्गय् पलाः तयेगु खः । थुकिं यानाः जीवनय् दीर्घायु जुइ । आयु वर्ण सुखबल प्राप्त जुइ । रुप लावण्य बांलाइ । बल शक्ति सम्पन्न जुइ । शरीर व मन सुखी जुइ । प्रज्ञा वृद्धि जुइ । परम्परा न्ह्याकेत, द्यः पुज्यायेगु मखु । द्यः धयाम्ह सु खः ? द्यः छाय् पुज्यायेमाः ? द्यः पुज्यानाः छु प्राप्त जुइ ? थ्व सकतां खँ थुइकाः जक पुजा यायेमाः ।

तथागत बुद्धं बुद्ध शिक्षायात व्यवहारय् छ्यःसा जक तथागतया पुजा जुइगु खँ कनाबिज्याःगु दु । थुकिं शासन चीरस्थायी जुइगु, शिष्यश्रावक सकलें सुखी जुइ । उकिं वसपोलं धयाबिज्याःगु दु – जि तथागतयात असिम पुजां पुजा यायेमात्रं तथागत प्रति यःगु मजू । धर्मपूजां पुजा याःसा जक तथागतयात यःगु जुइ ।

सम्बन्धित बुखँ

LEAVE YOUR COMMENTS