हाकनं अशान्तिया सुपाँय्

देसय् झिदँ तक जूगु जनयुद्ध क्वचाःगु झिदँ दुने हे हाकनं मेगु अशान्तिया सुपाँय् खने दयावःगु महसुस जूगु दु । छगू इलय् शेरबहादुर देउवाया सरकारं प्रचण्ड व बाबुराम भट्टराईपिनि छ्यंया मू तोके याःथें आः थःपिं नापनापं जनयुद्धय् दुथ्याःम्ह विप्लब नेतृत्वया नेकपायात सरकारं प्रतिबन्ध तयेवं थ्व खँया महसुस जूवंगु खः ।

छखे प्रधानमन्त्री केपी ओली व नेकपा अध्यक्ष प्रचण्डयात स्यायेगु निंतिं नां धलः तयार यानातःगु दस्तावेज लुल धकाः माओवादीया उगु हिंस्रक गतिविधि नियन्त्रण यायेगु ज्या नेपाल सरकारं यानाच्वंगु दुसा मेखे थःपिनि व्यक्ति हत्याया योजना नं मदु व अज्याःगु कथं व्यक्ति हत्या याइपिं जुल धाःसा नां धलः तयार यानाः जुइ नं मखु धकाः उगु होहल्लाया खण्डन नं विप्लवं यानाच्वंगु दु ।

थथे निगू विपरित शक्ति थें खने दयाच्वंगु सत्तापक्षी व प्रतिपक्षी जूवंगु माओवादी शक्तिया थ्व द्वन्द्वःया कारणं आः हाकनं छक्वः अशान्तिया सम्भावना ब्वलंगु दु । छगू पार्टीया नेता जुयाच्वंपिं प्रचण्ड, डा. बाबुराम भट्टराई व नेत्रबिक्रम चन्द ‘विप्लब’ माओवादीया न्ह्यथनेबहःपिं नेतात खः ।

उपिं आः थवंथः मिले मजुइवं हाकनं जनयुद्ध वा सशस्त्र क्रान्तिया खँ ल्हानाः समृद्ध नेपाःया सोचय् वनेधुंकूगु वर्तमान इलय् हाकनं छक्वः देसय् थाय्थासय् बम विस्फोट, हत्या व दुखद् घटना जूगु खने दयावःगु दु । थ्व इलय् नं झी हाकनं युद्ध, अशान्ति थेंज्याःगु झन्झटय् तक्यनाच्वन धाःसा अझ नेपाः विकास निर्माण व समृद्धिइ लिउने लाइगु खने दयावःगु दु ।

थ्व मामालाय् सम्पूर्ण नेता व कार्यकर्तातय् सोच विकास यायेमाःगु दु कि युद्धं हतियारया व्यापार जुइ, देय्या आर्थिक क्षति जुइ अले विदेशीतय्त थ्व देसय् हतियार मियाः थनया दां पिने यंकेगु निंतिं तःधंगु हे ग्वाहालि जुइ । उकिं देय् व जनताया लागिं धाःसा आर्थिक रुपं व मानसिकघाटा जुइ ।

समृद्ध धाःपिं स्वनिगः दुनेया नेवाः जातिं तकं नेपालमण्डल झीगु थःगु हे खः धइगु कथं आन्दोलन व युद्ध याये मफयाच्वंगु ई खः थ्व । थ्व इलय् मधेश आन्दोलनपाखें सयेका नेवाःत नं थःगु अधिकारया लागिं न्ह्याः वनेमाःगु ई वयाच्वंगु दु ।

उच्च सोच दुपिं व राज्यया थीथी थासय् च्वनाः ज्या यायेफुपिं वा राजनीतिक धारणा विकास जूपिं मनूत छथाय् मच्वंतले गबलें झीगु देय् विकास जुइ फइमखु । जनयुद्धया इलय् सरकार छखे व विकास योजना मेखे लानाच्वंगु कारणं थन विकास निर्माण लिउने लाःगु खः । आः वया युद्धरत शक्ति व प्रतिरोध यानाच्वंगु बिद्रोही शक्ति छगू हे थासय् लानाच्वंगु ई खः ।

थथे जुयाः आः तुरुन्त छुं यायेगु धइगु नीति नं सरकारं काःगु दु । थज्याःगु इलय् छुं याये मफुत धाःसा झीगु देसय् गबले विकास निर्माण व समृद्धिया ज्या खँ न्ह्यःने यंकेफइ ? सरकारं विप्लवया नेपाल कम्युनिष्ट पार्टीयात प्रतिबन्ध तये धुंकाः आःतकं उगु पार्टीया झिंन्हय्म्ह कार्यकर्ता हिरासतय् लाये धुंकूगु दु ।

थुकि उच्च तहया पोलिटब्यूरो सदस्य तकं लाःगु विप्लवं धाःगु दु । थ्व झ्वलय् विप्लवं राजधानी नापं थीथी थासय् सक्कली व नक्कली बम तयाः आतंक मचे यायेगु ज्या यात । थज्याःगु अवस्थाय् प्रचण्डया हत्या यायेगु योजना मदु धयागु धाःसा स्पष्ट याःगु दु । बरु थ्व इलय् पुलांगु माओवादी पार्टीया नेता प्रचण्डयात ज्वनेगु कथं अमेरिकाय् उजुरी तःगु खँ पिहां वयाच्वंगु दु ।

छगू माओवादी पार्टी पूँजीवादी सरकारय् दुहां वनाः थःपिनि जनयुद्धया लाइन त्वते धुंकूगु अवस्थाय् मेगु पार्टीं धाःसा छु यात धाःसा हाकनं सरकारयात दुःख बिइफइ व स्वयाच्वंगु दु । थथे जुइबलय् गबले झीगु देसय् शान्ति व सुव्यवस्था कायम यायेफइ ? छगू इलय् माओवादीयात अमेरिकां माओवाद व माओयात माने याइगु हे शक्ति तायेकूगु खइ, आतंककारीया धलखय् तल ।

आःतकं उगु आतंककारी शक्तिया धलखं नेपाःया माओवादी पार्टीयात अमेरिकां चीकूगु नं मदुनि । उकिं हे थः कलाः सीता दाहालया उपचार याकेत अमेरिकाय् वंम्ह माओवादी नेता प्रचण्डयात ज्वनीगु खँ न्ह्यःने वल । तर थ्व इलय् अमेरिकां सरकारय् संलग्न जुयाः युद्धपाखें बिमुख जुइधुंकूगु खँ थुइका हे खइ, औपचारिक रुपं ‘नो इन्भेष्टिगेशन’ नोटिश हे जारी यानाः आः थ्व इलय् प्रचण्डयात छुं नं कथंया केरकार मयायेत सूचना जारी याःगु दु ।

अमेरिकाय् युद्ध अपराधया द्वपनय् ज्वनीगु खँ हुइना भुइना जुइवं उगु नोटिश जारी याःगु खँ पिहांवःगु दु । पुलांगु माओवादी जनयुद्ध यानाच्वंगु शक्तिया नायः धइगु रेकर्ड नं अमेरिकायात दुगु हे जुल । उकिं नं थुकथंया गतिविधि यानाच्वंम्ह नेता प्रचण्डयात ज्वनीगु खँ पिहांवःगु खः । अशान्तिया इलय् जूसा प्रचण्डयात अमेरिकां अथें बेवास्ता याइ नं मखु ।

थ्व इलय् ला सरकारय् वनाः झी नेतात पूँजीवादी भासय् लुकूं हे बिइधुंकूगु अवस्था दु । उकिं नं आः अमेरिकी साम्राज्यवादया न्ह्यःने नेपाः छगू सहयोगी राष्ट्र थें खने दयाच्वंगु दु । म्हिगः माओवादीया नां हे तयाः जनयुद्धया घोषणा तकं याना जूगु इलय् व आःया अवस्था धाःसा सर्गः व पाताल थें पायेधुंकल ।

थ्व इलय् अमेरिकायात माओवादी पार्टी व उकिया नेतात प्रखर कम्युनिष्ट मखु धइगु वाः चाये धुंकूगु अवस्था दु । उकिं नं आः अमेरिकां उलि कडा मयाःगु खः । वास्तवय् नेपालय् आः नां जकया कम्युनिष्ट पार्टी कायम जुयाच्वंगु खँ नं अमेरिकां बांलाक हे वाःचायेधुंकूगु अवस्था दु ।
थथे स्वतन्त्र देशया नेता वा व्यक्ति मेगु अलग स्वतन्त्र देशया भ्रमण वनीगु इलय् तसकं हे ध्यानय् तयाः स्वइगु जुयाच्वन धइगु खँ थ्व इलय् झन अप्वः प्रमाणित जूगु दु ।

उकिसनं देसय् जनयुद्धया नामं आतंक व अराजक गतिविधि यानाः वयाच्वंगु पार्टीया नेता जूगु ल्याखं प्रचण्डया भ्रमण तसकं सम्वेदनशील जुइगु हे जुल । थ्व इलय् नेपालय् प्रचण्ड व बाबुराम भट्टराईपिं सुधारात्मक अभियानय् लगे जुइधुंकूसां थारु कल्याणकारी सभा थेंज्याःगु मधेशी शक्ति धाःसा आन्दोलनया तयारीइ दु । उमिगु आन्दोलन उलि सहज वा जनचेतनामुलक कथंया आन्दोलन नं जुइमखु ।

न्हापा न्हापा नं जनआन्दोलनय् मदुगु संघीयता थेंज्याःगु एजेण्डा थज्याःगु हे मधेशवादी आन्दोलनया माग कथं संविधानय् दुतिनेत ताःलाःगु खः । उकिं मधेश आन्दोलन चानचुनया आन्दोलन मखु धइगु क्यं । बरु समृद्ध धाःपिं स्वनिगः दुनेया नेवाः जातिं तकं नेपालमण्डल झीगु थःगु हे खः धइगु कथं आन्दोलन व युद्ध याये मफयाच्वंगु ई खः थ्व । थ्व इलय् मधेश आन्दोलनपाखें सयेका नेवाःत नं थःगु अधिकारया लागिं न्ह्याः वनेमाःगु ई वयाच्वंगु दु ।

सम्बन्धित बुखँ

LEAVE YOUR COMMENTS