ज्यापु समुदायया बहुमत लगानीइ फाइनान्स व अस्पताल संचालन यानाच्वनागु दु

नेवाःतय् जातीय संगठन मध्ये दकलय् धिसिल्लाःगु संगठन खः – ज्यापु समाज । लिपांगु इलय् ज्यापु समुदायया आर्थिक क्रान्तिया नारा बियाः ह्याः वयाच्वंगु ज्यापु समाजं नारा कथं थीथी ज्याखँ याना वयाच्वंगु दु । सामाजिक ज्याय् जक तमक्यँसे आर्थिक, शैक्षिक, स्वास्थ्य क्षेत्रय् नं ल्हाः तया वयाच्वंगु समाजया आर्थिक क्रान्तिया ज्याय् नेतृत्वदायी व प्रेरणादायी भूमिका म्हिता वयाच्वनादीम्ह समाजया तत्कालिन वरिष्ठ न्वकु व वर्तमान नायः तीर्थलाल महर्जनलिसे यानागु खँल्हाबल्हा छुं ब्व न्ह्यब्वयाच्वना ।

छगू दशक न्ह्यः ज्यापु समाजं ज्यापु समुदायया आर्थिक क्रान्तिया नारा बियाः थीथी ज्याखँ न्ह्याकूगु खः थ्व ज्या गुलि तक ताःलाःगु दु, अले छु गज्याःगु ज्याखँ जुयाच्वंगु दु ?
– ज्यापु समाजं सामाजिक सुधारया लिसें ज्यापु समुदाययात आर्थिक, शैक्षिक ख्यलय् नं बल्लाकेमाः धयागु भिजन तयाः ‘भिजन २०२०’ धकाः थीथी ज्याझ्वः हःगु खः । भिजन २०२० या छगू प्रमुख ज्याझ्वः धयागु ज्यापु समुदाययात आर्थिक रुपं बल्लाकेगु, तिबः बीगु खः । थुकिया माःगु तालिम बीगु, रोजगार सिर्जना यायेगु, उद्यम याइपिंत आर्थिक रुपं तीबः बीगु ज्या यायेगु आज्जु तयागु खः । थ्व हे आज्जु कथं समाजया पहलय् ज्यापु समुदायया ५१ प्रतिशत लगानी दुगु नेपाल राष्ट्र बैंकपाखें ‘ग’ समूह स्वीकृत बियातःगु वित्तीय संस्था ‘प्रोग्रेसिभ फाइनान्स’ संचालन जुयाच्वंगु दु । अथेहे आधुनिक सुविधा सम्पन्न ‘स्टार अस्पताल’ नं ज्यापु समुदायया ५१ प्रतिशत शेयर सहित संचालनय् वयाच्वंगु दु । थ्व बाहेक उद्यम सम्बन्धी तालिम बीगु ज्या निरन्तर न्ह्याका वयाच्वनागु दु ।

ज्यापु समाज ला छगू गैरनाफामुलक संस्था खः, थज्याःगु संस्थां वित्तीय संस्था, अस्पताल गुकथं संचालन जुयाच्वन ?
– साः क्वबिइपिं ज्यापुतय्सं देय्या धुकू नं क्वबिइमाः धयागु नारा ज्वनाः न्ह्यानाच्वंगु ज्यापु समाजपाखें हे छगू वित्तीय संस्था छगू संचालन यायेदःसा जिउ धयागु जिगु मतिइ दुगु खः । तर ज्यापु समाज गैरनाफामूलक संस्था जूगुलिं थुकिं आर्थिक रुपं लबः दइगु ज्याखँ यायेमजिउ । अथे जूगुलिं ज्यापु समाजलिसे आवद्ध दुपिं मुनाः छगू लगानी कम्पनी चायेकेगु बिचाः जुल । थ्व हे बिचाः कथं पहल सुरु याना । समाजया पहलय् समाजया पुलांपिं नायःपिं सकलें संरक्षक जुयाः ‘प्रोग्रेसिभ इन्भेस्टा गु्रप’ नामं छगू कम्पनी चायेका । थ्व ज्याय् समाजया पुलांम्ह नायः कुललाल डंगोलं जितः यक्व हे ग्वाहालि यानादिल । थ्व कम्पनी चायेके धुंकाः जिमिसं ज्यापु समुदायया बहुमत लगानी दइकथं प्रोग्रेसिभ फाइनान्स व स्टार अस्पताल न्यानाः संचालन यानाच्वनागु खः ।

छगू कम्पनीपाखें याःगु ज्याखँय् ज्यापु समुदाययात गुकथं लबः दइ ?
– थ्व छगू कम्पनी जूसां ज्यापु समाजलिसे समन्वय यानाः, ज्यापु समुदायया निंतिं ज्या याइगु, ज्यापु समुदाययापिं जक दुथ्याःगु कम्पनी खः । कम्पनीया समन्वयय् प्राग्रेसिभ फाइनान्स न्याना कयाबलय् कम्पनीया दुजःपिंसं जक शेयर कायेगु यानागु मखुकि यलया पीगू ज्यापु त्वाःयापिंत हे प्रमोटर शेयर, साधारण शेयर कायेत इनाप यानाः ध्यबा मुंकाः न्यानागु खः । थुकथं आः थ्व फाइनान्सय् ५१ प्रतिशत शेयर ज्यापु समुदायया ल्हातय् दु । उबलय् १५५ तकां न्यानागु शेयरया भाः थौंकन्हय् न्यासलं थहां वनेधुंकूगु दु । थुकिं शेयरय् लगानी यानादीपिं पीगुलिं त्वाःया ज्यापु समुदाययापिंत आर्थिक रुपं लबः दुगु जुल । अथेहे सा क्वबिइपिं ज्यापुतय्सं देय्या धुकू क्वबिइगु धयागु नारा नं सार्थक जूगु दु । थौं छगू वित्तिय संस्थाया रुपय् ज्यापुतय्गु ध्यबा ज्यापुतय्गु हे धुकुतिइ लाःवःगु दु । थुकी छगू न्ह्यइपुगु खँ तने, छुं नं वित्तीय संस्थाय् ज्यापु समुदायया मनूत संचालक जुयाच्वंगु धयागु तसकं म्हो हे जक दु, तर थ्व फाइनान्सया संचालकतय्गु नां धल स्वल धाःसा ९० प्रतिशत पदाधिकारीत ज्यापुत हे जक दु । फाइनान्सया अध्यक्ष कथं किशोर महर्जनजु दी । वित्तीय संस्थाय् दशकौंया अनुभव दुम्ह वय्कः न्हापा सनराइज बैंक व सिभिल बैंकया कार्यकारी प्रमुख जुयादीधुंकूम्ह खः । वय्कःया हे नेतृत्वय् बैंक व अस्पताल संचालन जुयाच्वंगु दु ।
केन्द्रीय बैंकया नियम कथं छुं नं वित्तीय संस्थां लबःया छुं प्रतिशत ध्यबा सामाजिक ज्याय् खर्च यायेमाः । थ्व कथं फाइनान्सं सामाजिक ज्याया निंतिं खर्च याइगु ध्यबा ज्यापु समुदाययात हे लाःगु दु । फाइनान्सं थौंकन्हय् दँय् न्हय्गू लाख तका ज्यापु समाजयात ग्वाहालि बिया वयाच्वंगु दु । थ्व ग्वाहालि लिपा अप्वया वनी धयागु खँय् छुं शंका मदु ।

अथेहे स्टार हस्पितल न्यानाबलय् नं थ्व अस्पताल घाटाय् वनाच्वंगु खः । फुक्क कथंया भौतिक पूर्वाधार दुसां संचालन यायेत थाकुयाच्वंगु हस्पितल जिमिसं न्यायेधुंकाः आः बांलाक संचालनय् वयेधुंकूगु दुसा लगानीकर्तातय्त थ्व दँय् लबः बीफइगु अवस्थाय् वयेधुंकूगु दु । थ्व अस्पतालय् नं थौंकन्हय् ५१ प्रतिशत शेयर ज्यापु समुदायया हे दु । थ्व अस्पताल न्यानाबलय् नं जिमिसं यलया ज्यापु समुदाययात जक मखु, यल, ख्वप, किपुया ज्यापु समुदाययापिंत नं शेयर न्यायेत आह्वान यानागु खः । थ्व हे आह्वान कथं २५ हजार तका लगानी याःपिंत अस्पतालय् उपचार यायेमाल धाःसा वासलय् बाहेक फुक्कं खर्चय् ३० प्रतिशत छुट बिया च्वनागु दु । थुकिया लिसें अस्पताल नाफाय् वन धायेवं वइगु लबः छखे हे दनि । अथेहे फाइनान्स व अस्पताल संचालन यायेधुंकाः थन यक्व ज्यापु समुदाययापिनिगु निंतिं रोजगारी चूलाःगु दु ।

छि थौंकन्हय् समाजया नायः जुयाच्वनादीगु दु ? आः छिगु योजना छु दु ?

– जि नायः जुइधुंकाः समाजपाखें यायेमाःगु ज्या धकाः ३८ गू ज्याया धलः दयेकातयागु दु । थ्व बारे समाजय् सहलह जुइ ल्यं दनि । अथे खःसां जिगु आःया मू योजना धयागु समाजं न्ह्याकाच्वंगु थीथी ज्या ताःकाल तक न्ह्याइगु कथं संस्थागत यायेगु पाखे दु । थ्व आज्जु कथं दकलय् न्हापां ज्यापु समाजं दयेकूगु वृद्धाश्रम ‘आनन्द निकेतन’ संचालन यायेगु जुइ । थ्व वृद्धाश्रम संचालनया निंतिं न्यागू करोडया छगू कोष हे दयेकेगु पाखे पहल यायेगु जुइ । अथेहे ज्यापु समाजय् ‘ज्यापु संग्रहालय’ दयेकातःगु दु । थ्व संग्रहालययात एशिया मापदण्डय् जातीय संग्रहालय दयेकेगु ज्या जुइ । अथेहे थीथी उद्यमया प्रशिक्षण बीगु निंतिं तालिम केन्द्र भवन दयेकेगु ज्या जुइ । मय्जु चिरिमैं महर्जनं पलंध्वाखाय् च्वंगु थःगु १२ आना जग्गा दयेकातःगु छेँ दान बियादीगु खः । थ्व छेँय् न्हापा ज्यापु कल्याण केन्द्र तयातःगु खःसा आः थ्व छेँ थुनाः आधुनिक सुविधा सम्पन्न तालिम केन्द्र भवन दयेकेगु जुइ । थन तालिम केन्द्रं तालिम कया वनकि अन्तर्राष्ट्रिय रुपं ज्या यायेत सक्षम जुइ । अथेहे ज्यापु प्रज्ञा भवनय् लाइभ पर्फमेन्स जुयाच्वनीगु लामपाटी दयेकेगु योजना दु । थ्व फल्चाय् दयेकेधुंकाः थन झीगु परम्परागत ज्यात ‘लाइभ’ प्रदर्शन जुयाच्वनी ।

अथेहे शैक्षिक संस्था चायेकेमाल धयागु नं खँ वयाच्वंगु दु । थ्व बारे नं सहलह जुयाच्वंगु दु । थ्व बाहेक ‘भिजन २०३०’ या नामं झिदँया कार्ययोजना दयेकेगु तयारी जुयाच्वंगु दु । थुकिया निंतिं याकनं हे वृहत् गोष्ठी जुइ ।

न्ह्यब्वःम्ह ः तेजनारायण महर्जन

सम्बन्धित बुखँ

LEAVE YOUR COMMENTS