ने. सं. ११४४ चौलाथ्व एकादशी - कामदा एकादशी

ऋद्धि व ऋद्धिवान

छुं मदुगु पा ल्हाः । म्हू चिनाः चायेकेवं अगू पिहां वइ । ह्वानाह्वाना च्यानाच्वंगु मिइ पलाः छिनाबी । फसय् ब्वयाः क्यनी । थःनापं च्वनाच्वंम्ह पासा तनी । अंगलं मनूया सः पिहां वइ । थ्व सकता जादु खः वा विशेष शक्ति ? थुकी थःथःगुकथंया विचाः दइ । खय्तला थुकथंया शक्तियात ऋद्धि धाइ । थुकथंया शक्ति दुम्हेसित ऋद्धिवानकथं काइ । ऋद्धि सकसिकें दइमखु। सकसिनं क्यने नं फइमखु। थौं जक मखु। बुद्धकाल व बुद्धकाल स्वयां न्ह्यःनिसें ऋद्धिवानपिं आपालं दु ।

तथागत बुद्धया ऋद्धिया वर्णन यानां साध्य मजू । वसपोलं दकलय् न्हापां असार पुन्हिकुन्हु ऋद्धि क्यनाबिज्यात । थुकियात ऋद्धि प्रतिहार्यकथं नं कायेगु याः । तथागत बुद्धत्व प्राप्तिलिपा नं वज्रासनं दना बिमज्याः । थ्व खनाः द्यःपिनि नुगलय् शंका ब्वलन । थ्व खँ तथगातं थुइकाबिज्यात । उकिं वसपोल आकाशय् बिज्यात । अन थःगु म्हं लः व मिया ज्वः पिकयाबिज्यात । थुकथं अनेककथं ऋद्धि क्यनाबिज्यात । अनंलि वसपोल थःगु हे आसनय् फ्यतुनाबिज्यात ।

यशकुमार बुद्धकालया छम्ह कुमार खः । व गृहस्थी जीवनय् विरक्त जुल । वया मनय् अशान्तं थाय् काल । व शान्तिया निंतिं छेँय् नं पिहां वल । व वँवं तथागतया आश्रमय् थ्यन। तथागतं वयात शान्ति यायेत उपदेश कनाबिज्यात। थुगु हे इलय् वया अबु वयात मामां अन थ्यंकः वल । अबुम्हं थःनापसं दुम्ह यशकुमारयात खंके मफुत। वं थः काय खँ ला? धकाः तथागतयाके न्यन। थुगु इलय् वसपोलं थःगु ऋद्धिं यशकुमारयात मखंका बिउगु खः ।

तथागत गबलें श्रावस्तीइ । गबलें साकेत नगर । गबलें राजगृह अले गबलें वैशालीइ आकाशमार्गं बिज्यात धइगु खँ नं बौद्ध साहित्यय् ब्वने दु। वसपोल देवलोक नापं तुषिताभुवनय् तकं थ्यंका बिज्यात। वसपोलयाके ऋद्धिया प्रभाव दुगुलिं थुकथं यानाबिज्याःगु खः । वसपोल जक मखु, वसपोलया शिष्यपिंके नं ऋद्धिया प्रभाव दु। वसपोलपिं नं आकाशमार्ग जुयाः न्ह्यज्याः बिज्यायेफु ।

सारिपुत्र महास्थविर तथागतया अग्रश्रावक खः । वसपोलया ऋद्धिया बारे नं स्वये । छन्हु सारिपुत्र महास्थविर कन्दरा नांया आख्य विहारय् च्वनाबिज्यात । थुगु इलय् यक्ष छम्ह वल । यक्षं वसपोलया छ्यनय् दाल । उकिया सः सर्गतय् थ्यंक थ्यन । पाःताः नं थर्के जुल । तर वसपोलयात छुं मजू । वसपोलयात कुसिं न्याःगु थें तकं मताः । बुद्ध शासनय् दकलय् ऋद्धिवानम्ह भिक्षुकथं मोद्गल्यायन महास्थविरयात कयातःगु दु ।

छन्हु सारिपुत्र महास्थविर कन्दरा नांया आख्य विहारय् च्वनाबिज्यात । थुगु इलय् यक्ष छम्ह वल । यक्षं वसपोलया छ्यनय् दाल । उकिया सः सर्गतय्थ्यं क थ्यन । पाःताः नं थर्के जुल । तर वसपोलयात छुं मजू। वसपोलयात कुसिं न्याःगु थें तकं मताः । बुद्ध शासनय् दकलय् ऋद्धिवानम्ह भिक्षुकथं मोद्गल्यायन महास्थविरयात कयातःगु दु ।

तथागतया शिष्यपिं नं ऋद्धि क्यनेत म्हो मजू । बुद्धकालय् अंग देशय् भद्दिय नांया नगर दु। अन मेण्डक गृहपतिया जन्म जुल । श्रेष्ठ कुलय् जन्म जूम्ह व तःधिकः जुइवं श्रेष्ठी कन्यानाप ब्याहा जुल । छुं ई लिपा इमि न्हापांम्ह पुत्रलाभ जुल । ई त्ययेवं कुल स्वयाः वया नं ब्याहा यानाबिल । वया च्यः नं शीलवानम्ह । वयाके १२,५०० गः भकारी दु। छन्हु वं थःके दुगु भकारी दक्वं सफा यात । व म्वःल्हू वन । अनंलि सर्गतय् स्वल । वं सर्गःपाखें छु स्वल । सर्गतं ह्याउँगु वा कुतुं वल । उगु वा दक्व भकारीइ दुहां वन । पलखं अन दुग दक्वं भकारी जाल ।

छुं ई लिपा वया कलाः वल । वं उगु जाकिया जा थुइके बिल । वँ लुँया पन्यू काल । जा बुइवं सुयात जा माः काः वा धकाः घोषणा यात । वया घोषणा न्यनाः म्वः म्वः मनूत मुं वल । वक्वसित इमिगु गलय् जायेक जा तयाबिल । मनूत दत्तले व दँ हे मदँसे जा बियाच्वन । वं जा तयेवं जासिइ हाकनं जा जाया वइगु। व मदंतले थलया जा म्हो मजू । अनंलि वया काय वल । वं थःगु म्हिचाय् द्वःछि दां तल । ‘ध्यबा माःपिंत काः वा’ धकाः सः थ्वयेकल । अन म्वः म्वः मनूत मुं वल । खय्तला वयाके द्वःछि दां जक दुगु खः । अय्नं वं अन वःपिं सकसितं म्हिचां जायेक जायेक दां इनाबिल । वया म्हिचां दां म्हो मजू ।

पलख लिपा भौम्ह वल । वं थःके दुगु दालाय् वा तल । ‘वा माःपिंत वा काः वा’ धकाः आह्वान यात। थुगु इलय् वा कायेत सलंसः मनूत मुन। अनं वःपिं सकसितं इमिगु थलय् जायेक वा तयाबिल । सकसिनं खुलातक गाक्क वा इनाबिल । अय्नं वया दालाय् व सुना मवं । वया च्वःयाके नं ऋद्धिया प्रभाव दु। व द्वहं ज्वनाः बुइँ वनी । वयाके नं बुँ पालेगु ऋद्धि दु। थ्व सकतां इमिगु पुण्यमय ऋद्धिया कारणं जूगु खः ।

तथागतया आपालं शिष्यपिंके ऋद्धि दु। उगु ऋद्धिया कारणं नानाःकथंया ज्याखँ यानाबिज्याःगु दु। वसपोलपिमध्ये अनिरुद्ध महास्थविरया ऋद्धिया बारे छक्वः स्वये । अनिरुद्ध शाक्य कुलया कायमचा खः । अनिरुद्ध थः पासापिंनापं बुद्ध शासनय् प्रव्रजित जूगु खः । छन्हु वसपोलया तथागत बुद्धया दर्शन यायेगु इच्छा जुल । उकिं वसपोल हिमालपाखें पहाड जुयाः सर्गतय् बिज्यात। थुकथं हिमाल-पहाड जुजुं सर्ग थ्यंकेगु नं ऋद्धिया प्रभावं हे खः ।

अथे हे छन्हु अनिरुद्ध स्थविर चक्रमण याना बिज्यात । थुगु इलय् वसपोलया तसकं प्वाः स्यात । प्वाः स्याःगु लंकेत वसपोलयात अनोतत्त दहया लः त्वनेमाःगु जुयाच्वन । थ्व खँ वसपोलया शिष्यं सिल । उकिं शिष्य श्रामणेरं लः कया हयेगु खँ न्ह्यथन । शिष्य श्रामणेर न्यास योजनया लँपु आकाशमार्ग जुयाः बिज्यात । अनया लः हल । उगु लः थः गुरु अनिरुद्ध स्थविरयात त्वंकल ।

थुकथं हे कौडिण्य महास्थविरया परिनिर्वाणया ईया खँ नं न्ह्यथनेबहजू । अनिरुद्ध स्थविरं कौडिण्य महास्थविर परिनिर्वाण जुयाबिज्याःगु सिल । उकिं वसपोल न्यासःम्ह भिक्षुपिंनाप आकाशमार्गं बिज्यात । थुकथं स्थविरनापं श्रावणेरपिंके नं ऋद्धिया प्रभाव दु। देव पुत्रपिंके नं ऋद्धिया प्रभाव दु। थुकथंया खँ नं अनिरुद्ध स्थविरया जीवनीइ न्ह्यथनातःगु दु। छन्हु आयुष्मान अनिरुद्ध कौशम्बिया घोषिताराम विहारय् च्वना बिज्यात। उगु इलय् मनापकामि देव पुत्रपिं अन वल । इमिसं वसपोलयात थःपिंसं स्वंगूकथंया खँ वसय् तयेफगु खँ कन । उगु स्वंगू थुकथं दु:-– गज्याःगु वर्ण माः, अज्याःगु हे वर्ण वयेकेफु। गज्याःगु सः माः अज्याःगु हे सः वयेकेफु। गज्याःगु सुख माः, अज्याःगु हे सुख बी फु। थुगु इलय् इमिसं वसपोलया मनया खँ थुल । उकिं इमिसं रुप धारण यात । गुम्हं प्याखं हुल । गुम्हं म्येँ हाल । गुम्हं बाजं थाल ।

ऋद्धि साधारण मनूयाके दइमखु। थ्व छगू बिस्कंगु प्रभाव खः । थुकिं प्रभावशाली दयेका बी । ऋद्धिवानयात सकसिनं हनाबना तइ । तर धाथेंम्ह ऋद्धिवानं माःगु इलय् जक थःगु ऋद्धि क्यनी । थुगु खँ बुद्ध शिक्षाय् कनातःगु दु ।