प्रव्रजित, गृहस्थी व भोजन दान
प्रव्रजित जुइगु । गृह त्याग यायेगु। भिक्षु वा भिक्षुणी जुइगु खः । थःगु छेँबुँ त्याग यायेगु। श्रीसम्पत्ति त्याग यायेगु। थः मांअबु दाजुकिजा तताकेहेँ कलाःभाःत कायम्ह्याय् सकतां त्याग यायेगु। भोग विलास सकतां त्याग यायेगु। साधारण कथं जीवन हनेगु हे प्रव्रजित जीवन खः। मयःपिंनाप बायाः च्वने अःपु। इपिं त्याग याये अःपु। तर थःत यःगु थःत यःपिं त्याग याये तसकं थाकु। इपिं नापं तापाना च्वने अःपु मजू । तर प्रव्रजित जीवन हने मयःगु व मयःपिं जक मखु। थःत यःगु व यःपिं नं त्याग यायेमाः ।
तथागत बुद्धं नं धयाबिज्याःगु दु- ‘प्रव्रजित चीवर व भिक्षापात्रय् सन्तुष्ट जुइमाः ।’ म्वायेत नसा नयेमाः । नसा नं मात्राछि व पाय्छि जुइक नयेमाः । थःगु म्हयात निंगु नसा ल्ययाः नयेमाः । मखुसा ल्वचं कइ । कष्ट जुइ । तर प्रव्रजितयात थम्हं धयाथें जाःगु नसा मदयेफु। प्रव्रजित जुइवं छेँखापतिकं भिक्षाटनय् वनेमाल । भोजन सःतूगु छेँय् थ्यंके माल । थुकिया आधारय् जीवन यापन यायेमाः । उकिं प्रव्रजित गृहस्थीं दान बीगु भोजनय् सन्तुष्ट जुइ । प्रव्रजित भोजनय् आशक्त जुइ नं मजिउ । भोजनया बारे तथागतं धम्मिक उपासकयात थथे धयाबिज्याःगु दु- ‘भोजन सेवन यायेगु क्रिडाया लागिं मखु। बलबान जुइत मखु। रुपरंग बांलाकेत । रुपवान जुइत नं मखु। बरु निरबद्यक कथं जीवन यापन यायेत खः ।’
प्रव्रजितयात गृहस्थीं थःगु छेँय् भोजनय् ब्वनी । गृहस्थीया छेँय् दुहां वनी । अन भोजन गृहण याइ । तर सकलें प्रव्रजितं गृहस्थीं ब्वंगु भोजन स्वीकार याइमखु। गुलिं प्रव्रजित सदां भिक्षाटनय् जक बिज्याइ । भिक्षाटनं वःगु भिक्षाय् सन्तुष्ट जुइ । छुं कथं भिक्षा प्राप्त मजुल । भोजन चूमलात धाःसा न्हिन्छिं द्यांलाना च्वनी ।
भिक्षाटनय् भोजन सदां भिंगु हे प्राप्त जुइ धइगु नं मदु। गृहस्थीं थःगु गच्छेकथं भोजन दान बी । थन बाराणसीया घटना न्ह्यथने । छगू इलय् तथागत वाराणसीइ भिक्षाटनय् बिज्यात । अन अलोमा नांया छम्ह मिसा दु। व अतिकं गरिबम्ह । वं तथागत भिक्षाटनय् बिज्याःगु खन । थम्हं भोजन दान यायेगु इच्छा ब्वलन । तर वयाके भिंगु भोजन मदु। वं थःगु न्ह्यःने दुगु फ्वसा ह्वये धुंकूगु जा खन । वं उगु फ्वास ह्वःगु जा तथागतया पात्रय् तयाबिल । तथागतं उगु भोजन गृहण याना बिज्यात ।
सकलें दातापिं सक्षम मजुइफु। गुलिसितं दान यायेगु इच्छा दयाच्वनी । तर थःके दान यायेत भोजन मदयाच्वनी । इमित जब सुनानं भोजन बी । उगु भोजनयात चित्त प्रसन्न यानाः दान बी । थुगु इलय् अतिकं कमसल व फोहरगु भोजन नं प्राप्त जुइफु। आयुष्मान महाकाश्यपयात नं थुकथंया हे भोजन प्राप्त जूगु खः ।
छगू इलय् तथागत वाराणसीइ भिक्षाटनय् बिज्यात । अन अलोमा नांया छम्ह मिसा दु। व अतिकं गरिबम्ह । वं तथागत भिक्षाटनय् बिज्याःगु खन । थम्हं भोजन दान यायेगु इच्छा ब्वलन । तर वयाके भिंगु भोजन मदु । वं थःगु न्ह्यःने दुगु फ्वसा ह्वयेधुंकूगु जा खन । वं उगु फ्वास ह्वःगु जा तथागतया पात्रय् तयाबिल ।
उगु इलय् छम्ह मिसाया सकलें छेँजः ल्वचं कयाः सित । थःगु छेँ त्वःताः नापं च्वंगु नगरय् वन । अन वयात ल्यंगु जा व क्वःगु जा बीगु यात । उगु जा नयाः वं थःगु जीवन हनाच्वन । छन्हु वं आयुष्मान महाकाश्यप भोजनय् बिज्याःगु खन । वयात नं भोजन दान बी मास्ति वल । वयाके उत्तम भोजन मदु। उकिं वं थःके दुगु भोजन थलय् स्वल । थलय् धू व घाँय् कुतुं वनाच्वंगु । वयाके चि छफुतितकं मदुगु क्वःगु व बासि जा जक दु। वं उगु भोजन आयुष्मान महाकाश्यपया पात्रय् तया बिल । वसपोलं उगु भोजन भपिया बिज्यात ।
भोजन सदां प्राप्त जुइ धइगु नं मदु। गबलें भोजन दान याइपिं नं मदयेफु। बुद्धकालय् वेरञ्जनाय् दुर्भिक्ष जुल । थुगु इलय् अनया जनता नापं भिक्षुगणयात नं भोजनया लागिं कष्ट जुल । जनता थःपिंत हे नयेगु नसा मदु। गनं भोजन दान बी । भिक्षुपिं न्हय्गू च्यागू गामय् भोजन बिज्याइ । दक्व मुना तःसां छक्वःयात नं भोजन मगाः । दुर्भिक्ष जूगुलिं छ्व अथवा जाकि छम्हू छम्हू जक दान बीगु। थुगु दुर्भिक्षया भोग तथागतं तकं यायेमाल ।
अथेला गबलें श्रद्धा मवनाः भोजन दान मबीपिं नं दु। बुद्ध, धर्म व संघयात सकसिनं श्रद्धा यायेमाः धइगु मदु। थःगु आस्था दुपिंसं जक त्रिरत्नय् श्रद्धा तइ । आस्था मदुपिंसं भिक्षु संघयात गबलें दान बी मखु। थुकथंया घटना थौंया जक मखु। बुद्धकालय् नं ब्वलंगु दु ।
रट्ठपाल गांया मुखियाया काय खः । तथागतया उपदेश न्यनाः वं थः प्रव्रजित जुइगु इच्छा यात । तर वया मांअबुया धाःसा वयात प्रव्रजित याये मयः । वं अतिकं जिद्दि यानाः प्रव्रजित जूवन । प्रव्रजित जूगु छुं ई लिपा हे अरहत नं जुल ।
छन्हु वसपोल भिक्षाया लागिं थःगु हे छेँय् बिज्यात । वसपोलयात सुना नं म्हसीके मफुत । बौम्हं थःगु छेँ क्वय् भिक्षु छम्ह खन । वयात तसकं तं पिहां वल । वं ‘छ थेंज्याःम्ह मुण्डे श्रवणं जिमि काय यंकल ।’ धकाः ब्वः बिल । सुनानं वयात भोजन दान मयाः । छुं ई लिपा भ्वातिं पिहां वल । वया ल्हातय् बासीगु केँ दुगु थल दु। वं केँ बँय् वांछ्वयेत स्वल । थुगु इलय् वसपोलं थःगु पात्र फल । ‘वांछ्वयेगु खःसा जिगु पात्रय् तया बिउ’ धासें वसपोलं पात्र न्ह्यःने तयाः बिज्यात । थुकथं प्रव्रजितयात भोजन प्राप्त मजुइगु इलय् वांछ्वयेत तयातःगु नसा तकं ग्रहण याये मालेफु ।
गृहस्थीं थःगु श्रद्धाया कारणं प्रव्रजितयात दान बीगु खः । प्रव्रजित हे जूसां गुलिसितं गृहस्थीं श्रद्धा तइ । गुलिं प्रव्रजितयात श्रद्धा तइमखु। थःत श्रद्धा वंपिं प्रव्रजित जूसा भिंगु भोजन नापं मरिचरि नं दान बी । श्रद्धा मवंसा थःके दसां क्वह्यंगु भोजन दान बी । मेत्तिय भुम्मिज्ज्क भिक्षुपिंत नं थथे हे जूगु ख ।
बुद्धकालय् राजगृह नगरय् कल्याण भत्तिक नांया गृहपति दु। व अतिकं श्रद्धालुम्ह खः । उगु
इलय् राजगृह नगरय् स्थविर भिक्षुपिंत भिंगु भोजन दान बी । घ्यः, चिकं नापं मरिचरि नं दान बी । तर छवर्गीय भिक्षुपिंत साधारण भोजन जक दान बी । कल्याण भत्तिक गृहपति नं स्थविर भिक्षुपिंत अतिकं भिंगु भोजन दान बीगु खः । वया छेँय् भोजन वःपिं सकलें सदां सुन्तुष्ट ।
छन्हु मेत्तिय भुम्मिजक भिक्षुपिं गृहपतिया छेँय् भोजनय् थ्यन । अन इमित बांलाःगु आसनय् मतः । थुलि जक मखु। भोजन दान बीगु इलय् गृहपत्ति न्ह्यःने तकं मवः । भोजनय् नं च्वकिया जानाप मरि जक बिल । घ्यः चिकंया नां तकं मदु ।
कल्याण भत्तिक साःगु, भिंगु, उत्तमगु भोजन दान बीम्ह गृहपति खः । अय्नं गृहपतिं क्वह्यंगु भोजन दान यात । न्ह्याथेंजाःगु भोजन दान याःसां प्रव्रजितं गृहण याये हे माल । मेत्तिय भुम्मिजकपिंसं नं उगु भोजन ग्रहण यानाबिज्यात । न्ह्यागु इलय् जुइमाः प्रव्रजितं थःत प्राप्त जूगु लाभय् हे सन्तुष्ट जुइमाः । थुकिं हे निर्वाण मार्गय् थ्यंका बी ।
LEAVE YOUR COMMENTS