च्याम्पियन्स लिग बार्सिलोनायात स्तब्धयासें लिभरपुल फाइनलय्
च्याम्पियन्स लिग सेमिफाइनलया निगूगु लेगय् उत्कृष्ट पुनरागमन यासें लिभपुरल झ्वःलाक्क निक्वःगु खुसी फाइनलय् थ्यंगु दु । म्हिगः चान्हय् जूगु कासाय् ला लिगा च्याम्पियन बार्सिलोनायात स्तब्ध यासें लिभरपुलं फाइनलय् थाय् दयेकूगु खः। सेमिफाइनलया न्हापांगु लेगय् बार्सापाखें ३–० गोलं पराजित लिभरपुल निगूगु लेगय् उत्कृष्ट प्रर्दशन यासें शून्यया विरुद्ध ४ गोल यानाः समग्र ४—३ गोलं विजय जूगु खः ।
लिभरपुलया मू कासामि मोहम्मद सलाह व रोवर्टो फिर्मिन्हो चोटया कारणं म्हितेमखंगुलि बार्र्सिलोनायात फाइनल प्रवेश यायेत थाकू मजुइगु अनुमान यानातःगु खःसां लिभरपुलं घरेलु मैदानय् स्टार कासामिं जाःगु बार्सिलोना तसकं दबाबय् लाःगु खः । फाइनल प्रवेश यायेत लिभरपुलयात छगू हे गोल मनसे प्यंगू गोल यायेमागु खः, अले लिभरपुल उकी सफल नं जुल ।
बार्सायात स्तब्ध यायेत लिभरपुलयात डिभोक ओरिगी व जोर्जिनियो विज्नाल्डम निगू निगू गोल यात । लिभरपुलं कासाया ७ औं मिनेटय् ओरिगीया गोलं अग्रता काःगु खः । न्हापांगु हाफय् छगू गोलया अग्रता काःगु लिभरपुलं निगूगु हाफय् स्वंगू गोल याःगु ।
निगूगु हाफय् एन्ड्रियु रोबर्टसनया थासय् वःम्ह जोर्जिनियो विज्नाल्डम १२२ सेकण्ड दुने निगू गोल यानाबिल । लिभरपुलया निंतिं कासाया ७९ मिनेटय् ओरिगीं थप छगू गोल यायेवं बार्सिलोना सेमिफाइनलं पिने लाःवंगु खः। डिभोक ओरिगी च्याम्पियन्स लिगय् न्हापांगु गोल याःगु खः ।
LEAVE YOUR COMMENTS