ने. सं. ११४३ चौलाथ्व सप्तमी -

जोकोभिचयात अस्ट्रेलियां पितिनिगु जुल

एजेन्सी- विश्व नं. १ टेनिस कासामि नोभाक जोकोभिचयात अस्ट्रेलियां पितनीगु हे जूगु दु । अस्ट्रेलियन ओपन टेनिस म्हितेत अस्ट्रेलियाय् थ्यंम्ह जोकोभिचयात अनया सरकारं कोभिड सम्बन्धी नियम पालना मयाःगु धासें भिसा रद्द यानाबिउगु खः । जोकोभिचं थुकियात कयाः निक्वःगुखुसी तःगु मुद्दायात अस्ट्रेलियाया संघीय अदालतं खारेज यानाबीवं वं देश त्वःतेमालीगु जूगु खः ।

संघीय अदालतया स्वम्ह न्यायाधीशतय्सं सर्वसम्मतिं सरकारं जोकाभिचया भिसा रद्द यायेगु धकाः याःगु निर्णय कायम हे जुइगु आदेश बिउगु खः । थुकिया लिसें जोकोभिचं आः अस्ट्रेलियन ओपन टेनिस नं म्हिते मखनीगु जूगु दु ।

अदालतया निर्णय लिपा जोकोभिचं थः तसकं निराश जूगु धासें तर थःम्हं अदालतया निर्णययात सम्मान यायेगु धाःगु दु । ‘जि अस्ट्रेलियां पिहां वनेगु निंतिं सम्बन्धित निकाययात ग्वाहालि यायेगु जुइ’ सर्वियाया कासामि जोकोभिचं छगू वक्तव्य पितबिसें धाःगु दु ।

अस्ट्रेलिनय ओपन म्हितेगु निंतिं वःम्ह जोकोभिचयात अस्ट्रेलियन सरकारं वंगु जनवरी ६ तारिखय् भिसा रद्द यासें आप्रवासी हिरासतय् तःगु खः । थुकिया विरुद्ध जोकोभिचं तःगु छगू मुद्दाय् स्थानीय अदालतं सोमवाः सुनुवाई यासें सरकारं याःगु निर्णय गलत जूगु धासें जोकोभिचयात तुरुन्त त्वःतेत आदेश बिउगु खः । थ्व लिपा नं अस्ट्रेलियन सरकारं हाकनं जोकोभिचया भिसा रद्द यासें आप्रवासी हिरासतय् तःगु खः । थुकिया विरुद्ध निक्वःखुसीइ तःगु मुद्दा धाःसा संघीय अदालतं खारेज यासें सरकारया निर्णय पक्षय् फैसला न्यंकूगु खः ।

अस्ट्रेलियन ओपन सोमवाःनिसें सुरु जुइत्यंगु दुसा जोकोभिचं न्हापांगु न्हि कुन्हु थःगु हे देयया कासामिलिसे म्हितीगु तालिका दुगु खः ।