एसिसि प्रिमियर कप – नेपाः समूह विजेता, कुवेतलिसे सेमिफाइनल म्हितीगु
येँ (नेपालभाषा टाइम्स)÷ येँ न्ह्यानाच्वंगु एसिसि प्रिमियर कपय् नेपाः समूह बिजेता जूगु दु । स्पिनर सन्दीप लामिछानेया अलराउण्ड प्रदर्शनया ग्वाहालिं बिहिवाः जूगु कासाय् कतारयात ६८ रनं बुकुसें नेपाः समूह विजेता जुयाः सेमिफाइनलय् म्हितीगु जूगु खः ।
त्रिभुवन विश्वविद्यालयया रंगशालाय् जूगु कासाय् नेपालं न्हापां ब्याटिङ यासें मुक्कं १५७ रन जक दयेकूगु खः । तर लिसलय् ब्याटिङ याःगु कतार मुक्कं ८९ रन दयेकाः २५.१ ओभरय् अलआउट जुल । कतारया निंतिं जाहिर इब्राहिम व खुाम शाहजादं जक १५÷१५ रन दयेकल । मेपिं निगः आखःया ल्याः तकं दयेकेमफुत ।
नेपाःया निंतिं सन्दीपं न्यागू विकेट कालसा सोमपाल कामी स्वंगू व ललितनारायण राजवंशीं निगू विकेट काल । सन्दीपं ९.१ ओभर बलिङ यासें ३ मेडन तयाः मुक्कं १४ रन बियाः न्यागू विकेट काःगु खः । अथेहे सोमपालं ७ ओभरय् १ मेडन तयाः २४ रन खर्चया स्वंगू विकेट कालसा ललितं न्यागू ओभरय् २७ रन बियाः २ विकेट काःगु खः ।
न्हापां ब्याटिङ याःवःगु नेपालं नं कमजोर ब्याटिङ यासें मुक्कं ४०.३ ओभरय् १५७ रन दयेकाः अल आउट जूगु खः । नेपाःया निंतिं सन्दीपं हे दकलय् अप्वः ४२ रन दयेकल । अविजित सन्दीपं ५८ बलय् खुगू चौका थ्वाःगु खः । मुक्कं १११ रन थ्वानाः ९ विकेट वनेधुंकूगु अवस्थाय् सन्दी व ललितं अन्तिम विकेटया निंतिं ४६ रनया साझेदारी याःगु खः । ललित १७ बलय् मुक्कं १ रन दयेकूगु अवस्थाय् आमिर फारुकया बलय् एलबीडल्यू जूगु खः ।
नेपाःया निंतिं कप्तान रोहित पौडेलं २७ रन, आसिफ शें १९ रन, कुशल भुर्तेलं २ रन, भीम सार्किं ६ रन, कुशल मल्लं ३ रन, सोमपाल कामीं ११ रन, आरिफ शेखं ११ रन दयेकूगु खः ।
समूह ए पाखें ओमान प्यंगू कासा म्हिताः ६ अंक कयाः उपविजेता जुयाः सेमिफाइनलय् थाय् दयेकूगु दु । नेपालं सेमिफाइनलय् समूह बीया उपबिजेता कुवेत लिसे म्हितीगु जुइ । कुवेतं शुक्रवाः हे हंगकंगयात ३० रनं बुकाः सेमिफाइनलय् दुहांवंगु खः । थ्व समूहया विजेता युएई जुल । युएई व कुवेत निगुलिं टिमं स्वंगू स्वंगू कासा त्याकाः ६–६ अंक काःगु खःसा रनरेटया ल्याखं युएई समूह विजेता जूगु खः ।
सेमिफाइनल कासा शनिवाः जुइसा फाइनल कासा सोमवाः जुइ । थ्व धेंधेंबल्लाखय् उपाधी त्याकूगु टिम एसिया कपय् छनोट जुइ ।
LEAVE YOUR COMMENTS