शिक्षक नियुक्ती अधिकार स्थानीय तहयात मबिइगु
येँ – शिक्षा, विज्ञान तथा प्रविधिमन्त्री गिरिराजमणि पोखरेलं विद्यालय शिक्षाया व्यवस्थापनया जिम्मेवारी स्थानीय तहया जूसां शिक्षक भीर्तया ज्या शिक्षक सेवा आयोगया प्रक्रियापाखें हे जुइमाःगु खँ धयादीगु दु । प्रतिनिधि सभाया शिक्षा तथा स्वास्थ्य समितिया मंगलवाः च्वंगु बैठकय् मन्त्री पाखेरेलं गुणात्मक शिक्षाया लागि शिक्षक दरबन्दी मगाःगु स्थितिइ केन्द्र सरकारं आवश्यक निर्णय यायेफइगु कथं तयारी यानागु व न्हूपिं िशक्षक भर्तीया निंतिं आयोगं विज्ञापन याइगु खँ कनादिल ।
गुलिखे स्थानीय तहं थःपिंसं हे न्हूपिं शिक्षक नियुक्ती व सरुवा यानाच्वंगु सन्दर्भय् मन्त्री पाखरेलं शिक्षक सेवा आयोगया लँ बाहेक मेगु तरिकां शिक्षक नियुक्त यात धाःसा व्यवस्थापन असहज जुइगु खँ कनादिल । मन्त्री पोखरेलं आन्तरिक प्रतियोगिताय् असफल जूपिं अस्थायी शिक्षकतय्त थ्व हे आर्थिक दँय् सुविधासहित बिदा बीगु व मेपिं शिक्षकतय्त तःक्वः आन्तरिक परीक्षाय् सहभागी यायेमफइगु नं स्पष्ट यानादीगु दु ।
अथेहे वय्कलं सरकारं हःगु नीति तथा कार्यक्रमय् सार्वजनिक शिक्षा सवलीकरण दशक घोषणा याःगुलिं थःपिनिगु ध्यान सामुदायिक विद्यालयया गुणस्तर सुधारय् वनीगु प्रतिबद्धता नं प्वंकादीगु दु ।
शिक्षक सेवा आयोगया
लँ बाहेक मेगु तरिकां शिक्षक नियुक्त यात धाःसा व्यवस्थापन असहज जुइगु
वय्कलं उच्चस्तरीय राष्ट्रिय शिक्षा आयोगया प्रतिवेदन २०७५या आधारय् राष्ट्रिय शिक्षा नीति तर्जुमा यायेत मन्त्रिपरिषदय् प्रस्ताव पेश यानागु जानकारी नं बिसें नीति वयेधुंकाः संघीय शिक्षा ऐन तर्जुमा यायेगु जानकारी नं बियादिल । मन्त्री पोखरेलं संसदीय समितिया सुझाव व निर्देशनयात मन्त्रालयं ग्रहण याइगु विश्वास नं प्वंकादिल ।
बैठकय् समितिया सभापति जयपुरी घर्तीं समितिया उपसमितिं शिक्षा क्षेत्रया समसामयिक सवालय् समस्या व समाधानया उपाय बारे तयार याःगु सुझाव प्रतिवेदन मन्त्री पोखरेलयात लःल्हानादगिु खः ।मन्त्रालयया सचिव खगराज बरालं न्हापा आवश्यक्ताया पहिचान मयासे विद्यालयया अनुमति बिउगुलिं शिक्षक व्यवस्थापनय् सरकारयात थप दायित्व लानाच्वंगुलिं विद्यालय समायोजन यायेमाःगु खँ धयादिल ।
बैठकय् सांसदतय्सं संविधानया मौलिक हकय् दुगु निःशुल्क शिक्षाया लागि बजेट विनियोजन जुइमाःगु, छात्रवृत्तिया ल्याः अप्वयेकेमाःगु, शिक्षक दरबन्दी अभाव व व्यवस्थापनया समस्या याकनं ज्यंकेमाःगु, सामुदायिक विद्यालयय् जुइगु अतिरिक्त आम्दानीयात अलग हे कोषय् तयेमाःगु लगायतया सुझाव बिउगु खः ।
LEAVE YOUR COMMENTS