बेलायतय् न्हापांखुसी यँयाः हन

येँ – युरोपेली राष्ट्र बेलायतय् न्हापांखुसी यँयाः नखः हंगु दु । पासा पुचः गुथि युके (लन्दन)या ग्वसालय् बेलायतय् न्हापांखुसी उकथं यँयाः नखः हंगु खः । मध्य लन्दनया क्लारेन्स वे हल क्याम्डेनय् जूगु यँयाः नखः हनाज्याझ्वलय् सत्याम्ह स्वयां अप्वः नेपाःमिलिसें बेलायती पाहां पिनिगु उपस्थिति दुगु खः ।

यँयाःया प्रमुख आकर्षण कुमारि माजुपाखें आशिर्वाद कयाः न्ह्याःगु ज्याझ्वलय् पुलुकिसि, लाखेप्याखंया नं प्रदर्शन याःगु खःसा हाथुद्यः पाखें हाथ्वँ नं हयेकूगु खः । अथे हे ज्याझ्वलय् न्ह्यइपुक समयबजि नयेगु ज्या नं जूगु खः । प्यदँ दुम्ह निर्भिका जोशीयात जीवित देवी कुमारिया रुपय् छाय्पियाः पुजा यासें ज्याझ्वः न्ह्याकूगु खः ।

पासा पुचः गुथि युके (लन्दन)या न्वकु रुक्मणि मानन्धरं लसकुस यानादीगु ज्याझ्वलय् दीपक श्रेष्ठ, सुसिस्मा मानन्धरं ‘ला छकू वयेक’, ‘लिक्क वयाः’ म्येँय् हुलाप्याखं न्ह्यब्वयादीगु खःसा , कलाकार रुपेश डंगोलं पुलुकिसि प्याखं न्ह्यब्वयादीगु खः । अथे हे चिचिधिकःपिं मस्तय्सं न्ह्यइपुक हुलाप्याखं न्ह्यब्वःगु खः ।

गुथिया नायः संयुक्त श्रेष्ठं ‘मस्तय् निंतिं यँयाः’या बारे प्रस्तुति बियादीगु खःसा यँयाःपुन्हिया बारे ज्याझ्वलय् उपस्थित स्वीम्ह मस्तय्सं चित्रण यानादीगु एनिमेटेड दृश्यया श्रृंखला नं न्ह्यब्वःगु खः । ज्याझ्वलय् गुथिया बोर्ड अफ ट्रस्टीजया अध्यक्ष ओजेश सिंहं ज्याझ्वः जुयाच्वंगु हलय् पुलुकिसिया नेतृत्व यानादिसें वय्कलं मजिपाः लाखेया भूमिकाय् समय् द्वँ मिले यायेगु नापं देवीदेवतायात अर्पण यानाः समय् द्वँ प्रसादया रुपय ह्वलादीगु खः ।

गुथिया पुलांम्ह नायः डा. सचेतन तुलाधरं हाथुद्यःया म्हुतुं पिहां वयाच्वंगु हाथ्वँ सकलें पाहांपिंत इनादीगु खः । थीथी जाति व धर्मया आपालं मनूतय् सहभागिता दुगु उगु ज्याझ्वः यक्वसिनं हे ययेकूगु गुथिं जानकारी बिउगु दु ।