स्वन्हुयंकंया कत्थक नृत्य कार्यशाला
येँ (नेपालभाषा टाइम्स)÷नेपाः डान्स एकेदेमिया ग्वसालय् स्वन्हुयंकंया कत्थक नृत्य कार्यशाला जुल । एकेदेमिपाखें हुलाप्याखंया थीथी विधाय् कार्यशाला यायेगु झ्वलय् थुगुसी कत्थक प्याखनय् उगु कार्यशाला याःगु खः ।
वंगु असोज १० निसें १२ गतेतक जूगु कार्यशालाय् भारतया कत्थक गुरु कुमार शर्मां कत्थकया प्रशिक्षण बियादीगु खःसा प्याखंया थीथी पक्षया बारे जानकारी नं बियादीगु खः ।
येँ महानगरपालिकाया उपप्रमुख सुनिता डंगोलया प्रमुख आतिथ्यताय् रसियन कल्चर सेन्टरय् जूगु कार्यशाला समापन ज्याझ्वलय् एकेदेमिया नृत्य प्रशिक्षकलिसें प्रशिक्षार्थीपिंसं थःथःगु प्रस्तुति बियादीगु खः । उगु इलय् एकेदेमिया निसः स्वयां अप्वः प्रशिक्षक व प्रशिक्षार्थीपिंसं प्रस्तुति बियादीगु खः ।
विशालबजार स्थित सासा ब्यांक्वेटय् जूगु कार्यशालाय् मोरङ, चितवन, बुटवल लगायतया थासं न्यय्म्ह स्वयां अप्वःसिनं ब्वति कयादीगु खःसा प्रशिक्षार्थीतय्त स्वंगू पुचलय् ब्वथलाः प्रशिक्षण बीगु ज्या जूगु ज्याझ्वःया संयोजकलिसें एकेदेमिया प्रमुख नापं नृत्य प्रशिक्षक रिना महर्जनं जानकारी बियादीगु दु ।
समापन ज्याझ्वलय् प्रशिक्षार्थीपिंसं धिमेया तालय् कत्थक नृत्यया प्रस्तुति बिउगु खः ।
LEAVE YOUR COMMENTS