स्थानीय निकाययात नं आन्तरिक त्यासा
येँ -स्थानीय सरकारं नं आः आन्तरिक त्यासा काये फइगु जूगु दु । थुकिया निंतिं संघीय मामिला तथा सामान्य प्रशासन मन्त्रालयं स्वीकृत बिउगु दु । मन्त्रालयं स्थानीय तहयात आर्थिक दँ २०७५÷७६ या माःगु बजेटया निंतिं मेगु स्रोतं आन्तरिक त्यासा कायेत स्वीकृति बिउगु खः ।
मन्त्रालयं फुक्कं स्थानीय निकाययात बुधवाः सर्कुलर जारी यासें स्थानीय निकायं थःगु विकास निर्माणया निंतिं आन्तरिक त्यासा काये फइगु खँ धाःगु खः । मन्त्रालयय् मंगलवाः च्वंगु बैठकं स्थानीय निकाययात निश्चित सीमा क्वःछिनाः आन्तरिक त्यासा कायेफइगु निर्णय याःगु खः ।
स्थानीय निकायं काइगु त्यासाया सीमा राष्ट्रिय प्राकृतिक स्रोत तथा वित्त आयोगं क्वःछीगु खँ धाःगु दु । त्यासा कायेबलय् संघीय सरकार व प्रदेश सरकारपाखें वइगु राजश्व बाँडफाँडया आधारय् स्थानीय तहया थःगु आन्तरिक स्रोतं बीगु राजश्वया योगफलया १० प्रतिशतं अप्वः जुइ मजिउ ।
स्थानीय सरकारं काइगु त्यासाया नियमन व सुपरीवेक्षण सुनां याइ धइगु खँ धाःसा स्पष्ट मजूनि । स्थानीय सरकारं त्यासा काये न्ह्यः केन्द्र सरकारया अनुमति धाःसा अनिवार्य रुपं कायेमाःगु व्यवस्था यानातःगु दु ।
LEAVE YOUR COMMENTS