बुंगद्यःया सेवाय् पान्जु

विद्यालय व सहकारीया ज्या त्वःताः यज्ञराज शाक्य वंगु बाःछि न्ह्यवंनिसें बुंगद्यःया सेवाय लगे जुयाच्वनादीगु दु । वर्षा व सहकालया द्यःकथं कयातःम्ह बुंगद्यःया पुजारी च्वनेत वय्कलं मेगु ज्यापाखें फुर्सद कयादीगु खः । विद्यालयया संस्थापकलिसें सहकारी संस्थाया नं अध्यक्ष जुयाच्वनादीम्ह वय्कः थःगु पेशा व व्यवसाय त्वःताः आः बुंगद्यःया सेवा लगे जुइगु धयादी ।

बुंगद्यःया सेवाया निंतिं ३१ म्ह पान्जु दुगु पान्जु संघया अध्यक्षतकं जुयाच्वनादीम्ह शाक्यं धयादिल । सकलें पान्जुया छम्ह लिपा मेम्हेसिया यायाः पाः वइ । थःगु पाः लाइबलय पान्जु बाःछितक द्यःयाथाय् च्वनेमाः । बुंगद्यःया पान्जुइ शाक्य व वज्राचार्य निम्हं दइगु वय्कलं कनादिल । निम्हेसियागु निंतिं नं ल्याः क्वःछिनातःगु दइ ।

वय्कःयाकथं ३१ म्ह पान्जुइ नीप्यम्ह शाक्य व न्हय्म्ह वज्राचार्य दु । वय्कलं धयादिल, ‘न्हूम्ह पान्जु नियुक्ति जुइगु इलय् शाक्यया थासय् शाक्य व वज्राचार्यया थासय् वज्राचार्य हे नियुक्त यायेमाःगु प्रावधान दु ।’ बुंगद्यःया पान्जुं देगलय् च्वने स्वयां छुं दिं न्ह्यवंनिसें हे आवश्यक विधि विधान पालना यायेमाःगु शाक्यं धयादिल ।

देगलय् च्वनीगु इलय् इमिसं अनया नियम पूर्णरुपय् पालना यायेमाः । बाःछितक देगलय् च्वनेत न्यान्हु न्ह्यवंनिसें हे छम्ह मेम्हेसित पान्जुयात साक्षी तयाः नियमय् च्वनेमाः । थःगु पाः शुरु जुइ न्यान्हु न्ह्यवंनिसें पान्जुं थः नियमय् च्वनागु प्रमाणित यायेमाः । व कुन्हु भ्वय् नयाः वयां कन्हय् कुन्हु द्यां लायेमाः ।

वयां लिपाया दिनय् शुद्ध व छछाः जक नयेमाःगु नियम दुगु शाक्यं कनादिल । पान्जु देगलय् च्वनेगु याःगु दिनंनिसें हे क्वःछिनातःगु शुद्ध नसाज्वलं जक नयेमाःगु वय्कलं कनादिल ।पुजारीं देगलय् भक्तजनं छाये हःगु नये मिले मजूगुलिं पिनें न्याना हयाः नयेमाः । वय्कलं धयादी, ‘जिपिं थन च्वनेबलय् देगलय् द्यःयात छाये हःगु नये मिले मजू, तर जिमि छेँजःपिंसं नये जिउ ।’

पुजारीया भोजनय् चाकि, चाकु, दुरु, चिग्वः कय्गू, दाल, पालु, चि, घ्यः व सिसाबुसा क्वःछिनातःगु दइ । थुपिं नसाज्वलं न्हियान्हिथं नयेमाःगु वय्कलं कनादिल । नसाज्वलं ज्वरे यायेत जहान, म्ह्याय्, भौलगायत छेँया मिसापित क्वःछिनातःगु दइ । आतक नं भुतुलिइ हे नसाज्वलं दयेकेगु यानाच्वनागु वय्कलं कनादिल ।

वय्कलं धयादिल, ‘जिमिसं फयां फत्तले दक्वं नियम माने याना वयाच्वनागु दु ।’ द्यःया सेवा याना च्वनेबलय् अप्वःथें कर्म परम्परागत हे जूसां नं छुं हिउपाः वयेधुंकूगु वय्कलं कनादिल । धर्म व संस्कारय् हिउपाः हयेके मबीगु गुलिखे खँ ईयात मल्वयेक जूगु अवस्थाय् जक हिला वनाच्वंगु वय्कलं धयादिल । वय्कःया कथं थ्वयां न्ह्यःया पुस्तातक पान्जुया नसाज्वलनय् साया ताजा दुरु धइगु खः आः धाःसा डेरीं न्यायेगु यानाच्वनागु दु ।
‘न्हापा न्हापा पान्जुं लाकां मन्ह्यासे चःबिइ वनीगु जूसां नं आः थःपिंसं लाकां न्ह्यानाः हे वनेगु यानाच्वना’, वय्कलं धयादिल, ‘सिँ हे च्याकाः ज्वरे यायेगु चलन न्ह्याबलें ल्यना मच्वनेफु ।’ स्वनिगःया हे दकलय् ताःहाकःगु जात्राया रुपय् बुंगद्यःया जात्रायात कायेगु यानातःगु दु । बुंगद्यःयात खुला यलया तःबहालय् व खुला बुंगय् यंकाः तयातइ ।

निखेरं जुइगु इलय् पान्जुतय्सं पालंपाः नियमय् च्वनाः द्यःया सेवा यायेगु यानाच्वंगु दु । बुंगद्यःया खः सालीगु जात्राया इलय् नं पालंपाः यानाः पान्जुत रथय् च्वनी । दँय्दसं जात्राय् निम्ह पान्जुया रथय् च्वनेगु पाः वइ । वय्कलं धयादिल, ‘छम्ह पान्जुया छक्वः पाः वल कि मेगु पाः झिंखुदँ लिपा जक वइ ।’

थुगु दँय् नं बुंगद्यःया जात्रा शुरु जू वनाच्वंगु दु । थुगुसी वइगु बछलाथ्व पारुकुन्हु बुंगद्यःयात रथय् बिज्याकी थ्व स्वयां न्ह्यः वइगु बैशाख ७ गते बुंगद्यःया न्हवं जुइ । बुंगद्यःया दशकर्म शुरु जुइधुंकाः यलय् जात्राया रौनक शुरु जुइ । बुंगद्यःया दशकर्म सिधयेवं हे द्यःयात रथय् बिज्याकेगु व रथयात्रा शुरु जुइ । बुंगद्यःया रथ जात्रा धाःसा बछलाथ्व चौथिकुन्हुनिसें न्ह्याइ । बुंगद्यःया जात्राया तयारी व संचालनया निंतिं यलया थीथी समुदायया संलग्नता दया वयाच्वंगु दु ।

सम्बन्धित बुखँ

LEAVE YOUR COMMENTS