सामाजिक संजाल अप्वया वनाच्वंगु ठगी प्रवृत्ति

रासस- सामाजिक संजालय् छितः आकर्षक उपहार लाःगु सुचं ला वयाच्वंगु मदु ? अज्याःगु सुचं वा जानकारीया प्रलोभनय् लानाः छिं अज्याःगु सुचं छ्वया हःम्ह मनूलिसे स्वापू जकं तया च्वनादीगु ला मदु ? यदि अथे यानाच्वनादीगु दु धइगु खःसा छि गठ नं जुयाच्वनेफु । सामाजिक संजालय् उपहार लाःगु, महत्वपूर्ण पार्सल वःगु धासें सुचं वा जानकारी छ्वया हयाः ठगे याइगु गिरोह येँय् सक्रिय जुयाच्वंगु दु ।
नेपाल प्रहरीं सामाजिक संजालया प्रयोग यानाः प्रलोभन क्यनाः ठगे याःगु द्वपनय् छम्ह विदेशीलिसे नेपाली नागरिकयात ज्वंगु दु । इमित ज्वनेवं सामाजिक संजालय् सुचं वा जानकारी छ्वयाः ठगे याइपिनिगु गिरोह सक्रिय जुयाच्वंगु पत्ता लगे जूगु खः ।

महानगरीय अपराध महाशाखां फेसबुक, ह्वाट्सएप, भाइबर, इमा थेंज्याःगु सामाजिक संजाल प्रयोग यानाः ठगे याःगु द्वपनय् काभे्रपलाञ्चोक भुम्लुटार छेँ जुयाः थौंकन्हय् येँया पेप्सीकोलाय् च्वनाच्वंम्ह कुसुम कायस्थ व आइभोरी कोस्टया नागरिक ओवोचार अलकाग्नीयात ज्वंगु दु ।

अपराध महाशाखायाकथं ज्वपिं निम्ह कलाःभाःत खः । इमिसं सामाजिक संजाल बाहेकं भारतीय मोबाइल नम्बरं फोन यानाः छिगु नामय् पार्सल वःगु दु, कायेत शुल्क पुलेमाः धासें थीी मनूतय्पाखें झिंप्यंगू लाख स्वीप्यद्वः ९७२ तका बराबरया ठगी याःगु पत्ता लगे जूगु दु ।
प्रहरीया कथं इमिसं उकथं ठगे याःगु ध्यबा येँया थीथी रेष्टुरेन्टय् खर्च यायेगु यानाच्वंगु नं पत्ता लगे याःगु दु । इपिं निम्ह कलाःभाःतया रुपय् येँया पेप्सीकोलाय् छगू फ्ल्याट बालं कयाः च्वना वयाच्वंगु खः । महत्वपूर्ण पार्सल वःगु व उकिया निंतिं शुल्क पुलेमाः धासें इमिसं नेपाःया थीथी बैंकया खाता नम्बर बियाः ध्यबा जम्मा याकेगु यानाच्वंगु प्रहरीया अनुसन्धानं पत्ता लगे जूगु दु ।

सुं म्हमसिउम्ह मनुखं सामाजिक संजालपाखें उपहार लाःगु व पार्सल वःगु धकाः सुचं वा जानकारी छ्वया हयाः उकियात कायेगु निंतिं लखौं तका दां खर्च यायेगु व लिपा सामान काये मफुगु घटना इलय्व्यलय् न्यना वयाच्वनागु हे खः । अज्याःपिंसं न्हापां छक्वः थुलि ध्यबा माः लिपा भचा मगात, हाकनं मेगु थुलि छ्वया हजि धकाः धायेगु याइगु खः । वयां लिपा नं तःक्वः तःक्वः हे इमिसं ध्यबा फ्वनेगु याना च्वनीगु खः ।

लिपांगु इलय् नेपाल प्रहरीं इपिं निम्ह कलाःभाःतं च्याम्हेसित अथे हे प्रलोभन बियाः ठगे याःगु पत्ता लगे याःगु दु । महानगरीय अपराध महाशाखां इमित आइतवाः जक पेप्सीकोलापाखें ज्वंगु व ठगी मुद्दाय् अनुसन्धान नं यानाच्वनागु जानकारी बिउगु दु । सामाजिक संजालय् उपहार लाःगु, पार्सल वःगु धासें अज्याःगु कथंया गुगुं नं सुचं वल धाःसा उकिया बारे प्रहरीयात जानकारी बीत नं महाशाखां इनाप याःगु दु ।