ने. सं. ११४३ तछलाथ्व त्रयोदशी -

छम्ह हे कलाकारया निगू म्युजिक भिडियो पिदन

कलाकारलिसें निर्देशक सुरज नापितया निगू म्युजिक भिडियो छक्वलं सार्वजनिक जूगु दु । वंगु शनिवाः थन पूच्वय् च्वंगु एम्बियन्स ३६५ य् जूगु छगू ज्याझ्वःया दथुइ उगु म्युजिक भिडियो सार्वजनिक याःगु खः ।

नेपालभाषा म्युजिक भिडियो ख्यलय् लोकंह्वाःम्ह कलाकारनापं निर्देशक नापितया ‘छंगु हिसि दुगु ख्वा …..’ व ‘ए जि यःम्ह तिमिला …..’ निपु म्येँया म्युजिक भिडियो सार्वजनिक याःगु खः ।

सार्वजनिक जूगु निपुं म्येँया म्येँ हालामि, च्वमि व लय्चिनामि कैलाश महर्जन खःसा म्येँय् संगीत संयोजन बुद्ध साय्मिं यानादीगु खः । म्युजिक भिडियोया निर्देशन नापितं यानादीगु खःसा सह निर्देशन सुजित नापितं यानादीगु खः ।

म्युजिक भिडियोमध्ये म्येँ ‘छंगु हिसि दुगु’ बोलया म्युजिक भिडियोय् निर्देशकलिसें कलाकार नापित व वय्कःया जहान रीना महर्जनं अभिनय यानादीगु दुसा मेगु ‘ए जि यःम्ह’ या म्युजिक भिडियोय् टिका घिमिरे, ज्यापुनी इन्टु, तुलसीराम गैरे, रोहन घिमिरे, वि.के. नेवाः लगायतया कलाकारं अभिनय यानादीगु दु ।

निगुलिं म्युजिक भिडियोया छायाँकन अमर चित्रकारं यानादीगु खःसा वय्कःया सहायककथं प्रजोन पराजुलीं ग्वाहालि यानादीगु खः ।
ज्याझ्वलय् नवासें मूपाहां असंबरें नेपालभाषा संगीत ख्यःयात आः आर्थिक रुपं नं क्वातुका यंकेमाःगु खँय् बः बियादीगु खःसा विशेष पाहां शाक्यं नेपालभाषाया म्युजिक भिडियो प्राविधिक रुपं नं बांलाका यंकेमाःगु खँय् बः बियादीगु खः ।

ज्याझ्वलय् म्युजिक भिडियोया कलाकारलिसें ग्वाहालिमि सकसितं मतिनाया चिं नं लःल्हाःगु खः । ज्याझ्वलय् संकिपा पत्रकार विजयरत्न असंबरे मूपाहां व नांजाःम्ह अभिनेता धिरेन शाक्य विशेष पाहांकथं झायादीगु खः ।