रत्न विपश्यनाय् छवाःयंकं अभिधम्म पाठ

येँ(नेपालभाषा टाइम्स)- स्वयम्भूया सानो भर्‍याङय् च्वंगु रत्न विपश्यना विहारय् न्ह्यानाच्वंगु अभिधम्म पाठ व धर्मदेशना ज्याझ्वः क्वचाःगु दु । विहारय् वंगु चैत १२ निसें १८ गतेतक छवाःयंकं उगु ज्याझ्वः जूगु खः ।

विहार प्रमुख श्रद्धेय भिक्षु सयादो उत्सुल महास्थविरपाखें पंचशील बियाबिज्यासे न्ह्याःगु ज्याझ्वलय् अखिल नेपाल भिक्षु महासंघपाखें अभिधम्म पाठलिसें धर्मदेशना बियाबिज्याःगु खः । वसपोल तथागत शाक्यमुनि भगवान बुद्धं सन्तुस्सित देवपुत्र (थःत जन्म बिउम्ह महामायादेवीयात) वर्षावासया इलय् स्वलातक तावतिंस देवलोकय् कनाबिज्याःगर उपदेश महासंघपाखें छवाःयंकंया ज्याझ्वलय् संक्षिप्त रुपं पालि भासं अभिधम्म पाठ व धर्मदेशना बियाबिज्याःगु खः ।

थनया सीघलय् च्वंगु धर्मकीर्ति विहारया धर्मकीर्ति मिजं पुचःया इन्द्र नकःमिं उगु ज्याझ्वःया ग्वसाः ग्वयादीगु खः । पुचःया दिवंगत सकल दुजःपिनिगु निर्वाण कामना यासें अभिधम्म पाठ व धर्मदेशना ज्याझ्वः जूगु खः ।

ज्याझ्वलय् भिक्षु भद्दिय महास्थविर, बोधिज्ञान महास्थविर, भिक्षु अशोक महास्थविर, भिक्षु रेवतलिसें अपालं भिक्षु, भिक्षुणी नापं उपासक उपासिकापिनिगु उपस्थिति दुगु खः । उगु इलय् भिक्षु अनागारिकापिंत दानप्रदानया ज्याझ्वः नं जूगु खः ।