संसद विघटनप्रति नेवाःतय् चिउताः

येँ (नेपालभाषा टाइम्स) – प्रतिनिधि सभा भंगं यानाः देशय् ब्वलंगु राजनीतिक घटनाक्रमयात कयाः नेवाः आन्दोलनलिसे आवद्ध नेवाः न्ह्यलुवा व नेवाः कार्यकर्तातय् दथुइ नं चिउताः ब्वलंगु दु। थ्व राजनीतिक घटनां यानाः आः देशय् छु गज्याःगु अवस्था ब्वलनी व उकिं यानाः नेवाः अधिकारयात गुलि लिच्वः लाकी धइगु विषयय् नेवाः ख्यलं चिउताः प्वंकूगु खः ।

संघय् प्रतिनिधिसभा भंग यायेधुंकाः आः थीथी प्रदेशय् च्वंगु प्रादेशिक सरकारतय्त नं खतरा ब्वलंगु दु । प्रम ओली समर्थित सरकारयात खतरा ब्वलन धाःसा संघीय सरकारं प्रदेशसभा समेत भंग यायेफुगु व उकिं यानाः संघीय व्यवस्था हे समाप्त जुइफइगु खतरापाखे नेवाः न्ह्यलुवातय्सं चिउताः प्वंकूगु दु ।

नेवाः न्ह्यलुवा मल्ल के. सुन्दरं वर्तमान संविधानय् नेवाः लगायत उत्पीडित समुदाययात अधिकार बीगु बुँदात दुमथ्याकूगु कारणं हे थज्याःगु दुर्घटना जूगु खः धासें आः संविधान संशोधन यानाः सकसितं अधिकार बीगु बुँदा थपे यात धाःसा संविधान अझ बल्लाइगु बिचाः तयादीगु दु ।

अथे हे मेम्ह नेवाः न्ह्यलुवा तीर्थराम डंगोलं थ्व राजनीतिक घटनां यानाः यदि संघीय कमजोर जुल धाःसा वयां लिपा धर्म निरपेक्षता व गणतन्त्र समेत खतराय् लाये फइगु बिचाः तयादिल । लिसें वय्कलं आः भंग जूगु प्रतिनिधिसभा पुनर्स्थापना मजुल धाःसा देय् तःधंगु हे अस्थिरता व अराजक अवस्था ब्वलनीगु ख्याच्वः नं बियादीगु दु ।

थ्व राजनीतिक घटनायात कयाः नेवाः न्ह्यलुवापिंसं थौं हे छगू मंकाः वक्तव्य जारी यासें चिउताः क्यनेगु तयारी यानाच्वंगु खँ सीदुगु दु । थुकिया नापनापं थ्व अवस्थायात कयाः अन्तक्रियात्मक गोष्ठी यायेगु व सम्भव दुसा सतकय् हे वयाः थःपिनि चिउताः क्यनेमाःगु खँय् नं सहलह जुयाच्वंगु खँ सीदुगु दु ।

सम्बन्धित बुखँ

LEAVE YOUR COMMENTS