गुथि विधेयक विरोधय् नेवाःतय्पाखें आइतवाः धर्ना

येँ । सरकारं हःगु गुथि सम्बन्धी विधेयकया विरोधय् नेवाःतय्सं आइतवाः माइतीघर मण्डलाय् धर्ना बीगु जूगु दु । आइतवाः न्हिनय् १ बजे माइतीघर मण्डलाय् संसदय् वयाच्वंगु गुथि सम्बन्धी विधेयकया विरोध यासें धर्ना बीत्यंगु खः ।
शुक्रवाः येँय् थ्व विषयय् जूगु छगू अन्तक्र्रिया ज्याझ्वलय् सहलह जूकथं आइतवाः हे विरोध प्रदर्शनया ज्या जुइत्यंगु खः । शुक्रवाः नेपाः ब्यांक्वेटय् जूगु अन्तक्र्रिया ज्याझ्वलय् गुथि संस्थानया वर्तमान अध्यक्ष मीनराज चौधरीं थ्व विधेयक पारित जुल धाःसा नेवाःतय्गु सम्पूर्ण गुथि नाश जुयाः जात्रा, पर्व, संस्कृति चले यायेत समेत थाकुइगु खँ कनादिल । थ्व विधेयक लित कायेकेगु लागिं थःपिंसं कुतः यानाच्वनां नं सांसदतय्सं न्ह्याथे यानाः नं पारित याकेगु कुतः यानाच्वंगु कारणं थुकियात पनेगु लागिं नेवाः समुदाय सचेत जुइमाःगु खँ नं वय्कलं कनादिल ।
डा. महेशमान श्रेष्ठ लिसें पत्रकारपिं सुरेश किरण व श्रीकृष्ण महर्जनपिंसं स्वतन्त्र कथं ग्वसाः ग्वःगु उगु अन्तक्र्रिया ज्याझ्वलय् सहभागी जूपिंसं थुगु विधेयकया विरोधय् तत्काल हे संघर्षया ज्याझ्वः घोषणा यायेमाःगु बिचाः तःगु कारणं शुक्रवाः हे नेपाः ब्यांक्वेटं तुं छगू ¥याली पिकासें धल्कोया दुवातय् गुथि सम्बन्धी विधेयक च्याकेगु ज्या नं जूगु खः ।
नेवाः देय् दबूपाखें नं आइतवाः हे थ्व विधेयक विरुद्ध संघर्ष न्ह्याकेगु बारे सहलह यायेत्यंगु दु ।

सम्बन्धित बुखँ

LEAVE YOUR COMMENTS