१५ गू करोड वंम्ह बखुं

मनूतय्सं करोडौं तका दां पुलाः छेँ–बुँ, सवारी साधन न्याइगु छुं न्हूगु खँ मखु, तर सामान्य छम्ह जीव वा पक्षीया निंतिं नं करोडौं तका दां पुलीपिं दु धायेबलय् अजू चाइगु स्वाभाविक हे जुइ । झीसं थःगु छेँय् लहीपिं चखुं, बखुं, खा, हँय्, खिचा आदिया निंतिं स्वसः प्यसः निसें च्याद्वः झिद्वः तका ला खर्च याना हे वयाच्वनागु खः ।

तर युरोपेली देय बेल्जियमय् छम्ह बखुंया निंतिं नं १५ गू करोड तका स्वयां अप्वः मू पुलाः नं न्याःगु खँ न्यनेबलय् धाथें सकलें अजू चाइ ।
बेल्जियमय् छगू लिलामय् ‘अर्मान्डो’ नांया उम्ह बखुं १ दशमलव २५ मिलियन युरो अर्थात नेपाली १५ गू करोड न्यय्खुगू लाख, ३०,५६२÷तका पुलाः न्यानाकाःगु दु ।

छाय् छम्ह बखुंया निंतिं नं उलिमछिं ध्यबा पुल ले ? थ्व न्ह्यसः ब्वलनीगु स्वाभाविक हे खः । अले थुकिया लिसः नं उलि हे न्ह्यइपुसे च्वं ।
बीबीसी समाचारयाकथं उम्ह बखुं मेमेपिं बखुं थें सामान्य धाःसा पक्का नं मखु । झीसं देगः, पल्लि वा झीगु छेँय् जू वइपिं थें सामान्य बखुं मखु थ्व । थ्व बखुं नं आपालं उडान कासा त्याकाः ‘सर्वोत्कृष्ट बखुं’या उपाधी कयातःगु दु ।

उकिं हे थ्व बखुंयात ‘बखुंतय् लुइस ह्यामिल्टन’ धकाः नं धायेगु याः । खतुं अर्मान्डो नांया थ्व बखुं हे जक आतकया दुने दकलय् अप्वः मू पुलाः न्याःम्ह बखुं धाःसा मखु, थ्व स्वयां न्ह्यः नं थथे हे छम्ह बखुंया निंतिं १५ गू करोड ५३ गू लाख ख्वीद्वः तका दामं लिलाम विक्री जूगु खः । तर उम्ह बखुंया कीर्तिमान अर्मान्डों त्वाःथला बिउगु दु ।

अर्मान्डो बखुं नं महत्वपूर्ण स्वंगू उपाधी त्याकूगु दु । सन् २०१८या ऐस पिजन च्याम्पियनशीप, सन् २०१९ य् जूगु पिजन ओलम्पियाड व अंगुलेम नांया छगू मेगु कासा अर्मान्डों त्याकूगु खः । यद्यपि थ्व स्वंगुलिं कासा अर्मान्डोया लिपांगु कासा खः । छाय्धाःसां न्यादँ दुम्ह थ्व बखुं आः अवकाशया जीवन हनाच्वंगु दु ।

बेल्जियमय् लिलाम याइगु संस्था ‘पीपा’या प्रमुख कार्यकारी अधिकृत निकोलास गोएसेलब्रेख्तं नं अर्मान्डो बखुं उलि कीर्तिमानी भावं विक्री जुइ धइगु विचाः मयाःगु खः । ‘जिमिसं ला प्यंगू – न्यागू लाख युरोय् अर्मान्डोया विक्री जुइगु अनुमान यानागु खः, अप्वलय् खुगू लाख तक’ गोएसेलब्रेख्तं बीबीसीयात धाःगु दु ।

अर्मान्डोयात कयाः निम्ह चिनिया व्यापारी लिलाम बढाबढय् भाः याःगु खःसा घौछिया दुने हे ५.३२ लाखं १.२५ मिलियन युरो थ्यंगु खः ।
अर्मान्डोयात न्याःम्ह वया न्हूम्ह मालिकं आः वयागुपाखें प्रजनन यानाः वयागु वशं वृद्धि यायेगु विचाः यानाच्वंगु दु ।
(बीबीसी)