बेलायती निर्णय गलत : चीन

एजेन्सी – बेलायतं चिनियाँ कम्पनी हुवावेया जीफाइभ नेटवर्कयात सन् २०२७ तकया दुने चिइकेगु धकाः याःगु निर्णययात चीनं निराशाजनक व गलत धकाः धाःगु दु ।

अमेरिकां हुवावेया उपकरणं राष्ट्रिय सुरक्षाय् जोखिम हइगु धासें प्रतिबन्ध तयेधुंकाः मेमेगु देय्यात नं हुवावेयात प्रतिबन्ध तयेत दबाब बिया वयाच्वंगु झ्वलय् म्हिगः बेलायती सरकारं नं हुवावेयात प्रतिबन्ध तयेगु घोषणा याःगु खः ।

थ्व घोषणा लिपा बेलायतया निंतिं चिनियाँ राजदूतं छगू ट्वीट यासें बेलायतया हुवावे सम्बन्धीनिर्णय निराशाजनक व गलत धकाः धाःगु दु। लिसें वय्कलं बेलायतं विदेशी कम्पनीयात निष्पक्ष व्यावसायीक वातावरण बीगु विषयय् नं न्ह्यसः थनादीगु दु । हुवावें नं बेलायती प्रतिबन्धय् प्रतिक्रिया बिसें धाःगु दु, ‘बेलायतय् मोबाइल ज्वनीपिं सकसियागुं निंतिं थ्व बांमलाःगु खबर खः ।’

बेलायतं आः तःगु प्रतिबन्ध हुवावेया ब्रोडब्यान्ड उपकरणय् नं लागू याःगु दु। सेवा प्रदायकतय्सं फाइबर नेटवर्कय् छ्यलेगु निंतिं हुवावेया उपकरण तकं न्याये मदइगु व्यवस्था बेलायत सरकारं याःगु खः ।

मेखे बेलायती प्रतिबन्धयात कयाः अमेरिकी राष्ट्रपति डोनाल्ड ट्रम्पं धाःसा लसकुस याःगु दु। वय् कलं धयादीगु दु, ‘जिमिसं गुलि फु उलि यक्व देय्तय्त हुवावे मछ्यलेत धयाच्वनागु दु, छाय्धाःसा जिमित ताः थ्व असुरक्षित दु, थुकिं सुरक्षाया जोखिम दु।’

बेलायतं अमेरिकाया हे दबाबय् हुवावेयात प्रतिबन्ध तःगु खँ संचारमाध्यमय् वयाच्वंगु दु। वंगु खुला न्ह्यव जक बेलायतं हुवावेया छुं उपकरण बेलायतय् छ्यलेगु निर्णय याःगु खः, तर थ्व निर्णय जूगु खुला लिपा हे हाकनं प्रतिबन्धया निर्णय याःगु
खः ।