सिटी व बार्सा विजयी
इग्लिस प्रिमियर लिगया म्हिगः चान्हय् जूगु कासाय् शीर्ष थासय् लानाच्वंगु म्यानचेस्टर सिटीं वाटफोर्डयात बुकल । घरेलु मैदानय् जूगु कासाय् सिटीं वाटफोर्डयात ३–१ गोलं बुकूगु खः । थ्व झ्वलय् रहिम स्ट्रलिड्डं ह्याट्रिक याःगु खः । वाटफोर्डया निंतिं जिरार्ड डेउलोफेउं छगू जक गोल यात । कासाया प्यंगुलिं गोल निगूगु हाफय् जूगु खः ।
निगूगु हाफया ४६ औं मिनेटय् रहिम स्ट्रलिड्डं न्हापांगु गोल याःगु खः । थ्व गोलयात वाटफोर्ड अफ साइड धाःसां रेर्फीं अफसाइड मजूगु निर्णय याःगु खः । न्हापांगु गोल जूगु प्यंगू मिनेट लिपा हे स्ट्रलिड्डं रियाद महरेजया क्रसय् मेगु गोल यातसा ५९ औं मिनेटय् डेभिड सिल्भाया पासय् गोल ह्याट्रिक गोल यात ।
थ्व ह्याट्रिकया लिसें स्ट्रलिड्डया थ्व सिजनय् गोल ल्याः १८ थ्यंगु दु । स्वंगू गोलं लिउने लानाच्वंगु वाटफोर्डया निंतिं डेउलोफेउं कासाया ६६ औं मिनेटय् गोल याःगु खः । प्रिमियर लिगय् जूगु मेगु कासाय् साउथह्याम्पटनं लिगया स्वंगूगु थासय् लानाच्वंगु टोटनह्यामयात २–१ गोलं बुकल । लिभरपुल लिगया निगूगु थासय् दु ।
उखे स्पेनिस ला लिगाया शीर्ष थासय् च्वंगु बार्सिलोनां रायो भालेकानोयात बुकाः निगूगु थासय् लानाच्वंगु एथ्लेटिको म्याड्रिडनाप ७ अंकया अग्रता कायम याःगु दु । बार्सिलोनां भालेकानोयात थःगु मैदानय् ३–१ गोलं बुकूगु खः । बार्सिलोनाया निंतिं कप्तान लियोनल मेसी, लुइस स्वारेज व जेरार्ड पिकें गोल याःगु खः ।
भालेकानोया नितिंं डि तोमस गोमेजं छगू जक गोल याःगु खः । कासाया न्हापांगु हाफय् निगू व निगूगु हाफय् निगू गोल जूगु खः । कासाया सुरुइ रायो भालेकानों अग्रता काःगु खः । रियल म्याड्रिडं भालेकानोय् लोनय् वःम्ह तोमसं कासाया २४ औं मिनेटय् २० यार्ड तापाकं प्रहार यानाः गोल याःगु खः ।
छगू गोलं लिउने लाःगु बार्सिलोनां न्हापागुं हाफया ३८ औं मिनेटय् बराबरी गोल यात । लियोनल मेसीं प्रहार याःगु फ्रि–किकय् जेरार्ड पिकें हेड यानाः बराबरी गोल याःगु खः । निगूगु हाफया ५१ औं मिनेटय् बार्सिलोनां पेनाल्टी गोलं अग्रता काल । बार्साया निंतिं मेसी पेनाल्टी गोल याःगु खः । मेसीं ला लिगाय् २५ गू कासा म्हिताः २६ औं गोल याःगु खः ।
कासाया ८२ औं मिनेटय् स्वारेजं मेगु गोल याःगु खः ।ला लिगाय् जूगु मेगु कासाय् निगूगु थासय् लानाच्वंगु एथ्लेटिको म्याड्रिडं लेगानेसयात १–० गोलं बुकल । छगू कासा कम म्हितूगु रियल म्याड्रिड लिगया स्वंगूगु थासय् दु ।
LEAVE YOUR COMMENTS